Jammu & Kashmir nung telungpur 300 shi kanga yakyaka lir: DGP

Srinagar, November 06 (Agencies): Jammu & Kashmir tensa mejungi akumtsüsa lir, ta shia tanü state DGP, K. Rajendra-i, state nung telungpur 300 shi lir, aser Line of Control (LoC) nung telungpurtem state telungi maneni aitba ya tebilemtsü tuluka lir, ta metetdaktsü.
Honibarnü Chief minister Mehbooba Mufti menden ser amenba civil aser sepai tongti ketdangsertem senden nung pai, “Arrtsülen telungurtem telungi maneni aitba ya tebilemtsü onük ka kümogo,” ta ashi.
July ita nung Hizbul Mujahideen commander Burhan Wani tepsetba sülen ita pezü jungnüa Kashmir tensa mesüngjemteti aliba dak sentakba nung Rajendra-i, iba tensa tera süngjema kümaka, maneni tensa raksatsüsa lir,  ta ashi.
“Tensa tera süngjema kümogo, saka tensa melamela raksatsüsa lir. Tang state nung telungpur 250-300 shi yakyaka lir, anungji taruba ita ana-asem atema sentong renemtsü nüngdak,” ta pai ashi.