Asür Yongkongangshi Longchar indang nüngshilung saya

November 5, 2016 nü Süngratsü yimtsüng nung asür Yongkongangshi Longchar nem tetushi agüja yangluba nüngshilung sayaba sentong nung Forum for Naga Reconciliation (FNR) Convenor, Rev. Dr. Wati Aier, Ao Baptist Arogo Mungdang (ABAM) Executive Secretary, Rev.Dr. Mar Atsongchanger aser tangartem külemi agiba noksa ka angur.

Dimapur, November 6 (TYO) : Asür Yongkongangshi Longchar nem akhüm tetushi agüja nüngshilung ka sayaba sentong nung Süngratsü yimertem den taoba mapang Naga nüjiso atema rarartem, shisashirtem, kaketshir lennirtem aser temeimertem aika adenshia kanga meraketa agiogo.
Naga nüjiso atema inyakba putiotsü nung asür Yongkongangshi Longchar tenüng metetshibo mejembitettsü. Pa ya Naga nunger nüjiso atema inyakertem tongti lennir rongnung ka liasü.
Asür Yongkongangshi Longchar ya Süngratsü yimtsüng nungi mezüngbuba graduate liasü aser March 22, 1956 nü Federal Government of Nagaland tentetang, pa mezüngbuba Kilonser inyaktsü shim. Pa dang par medemertem aser pa den külemi inyakertemi Yongkong ta aja.
Naga yimten tebilemtsü alima nem metetdaktsütsü atema September 10, 1962 nü pa den Khodao Yanthan, Gen. Kaito, Maj. Gen. Mowu aser AZ Phizo nungertem London-i ao.
Küm 51 tashi Naga nüjiso atema taküm bendanga agüja inyaka arur, April 24, 2006 nü Camden University Hospital, London nung Yongkong-i iba akümli toktsür ao. Pa arishi küm 83 liasü.
November 5, 2016 nü pa nüngtem nung yangluba nüngshilungji Ao Baptist Arogo Mungdang (ABAM) Executive Secretary, Rev. Dr. Mar Atsongchanger-i meshiteta sayatsü.
Iba sentong nung tongti tesemdangerji Forum for Naga Reconciliation (FNR) Convenor, Rev. Dr. Wati Aier liasü.
Sentong nung o jembidang, Rev.Dr. Wati Aier-i, “iba sentong ya Naga nunger asoshi tongtipang anogo ka lir” ta ashi.
Paisa Aortem indang teinyaktsü sentong asüngdang aser ibaji Aortemi dang atongtsüla ta shisem.
“Tanü asenok Aortemi “Pan Naga” yanglushir ama ajiteter, saka shitakba agibo asenoki Naga nunger len anitsüla” ta Rev.Dr. Wati-isa ashi.
Atlanta nung Rev.Dr. Wati-i Yongkong den ajurutepa sensaksemba bilemteta olen ka ashidang, Yongkong-i pa taküm piyong Naga nunger atema jembi aser inyak, ta metetdaktsü.
Tang ya Naga nungertem tejakleni aotsü mapang lir aser asenoki tejaklen repranga jajatsüla. AZ Phizo-i “Pan Naga” tamaitsü yangluba atema tenüngsang agütsür aser tesüiba mapang nüjiso angateta inyakbaji chichiba liasü, ta Dr. Wati-isa ashi.
“Tesüiba mapang asenok libaliro aser tangatetba ajanga asenok shinga daka memetaloki alir ta sayu. Phizo indang nationalism ji 100% liasü. Ajisüaka, tanü nüjiso atema inyakba mapa nung temulung melemteter. Tanü yimtenren mapaji maitsü den sendaktepa lir aser Naga nunger maitsü ka mangu lir. India Linük Temzüng ajanga Naga nunger ‘Scheduled Tribes’ kübok züngsema lir aser iba nung maitsü kecha mali” ta paisa shisem.
Naga nüjiso atema inyaktsü tenzüker lennirtemi nüjiso aser pei sasa yimten yimsüsüba kanga shitak angateta inyak saka tanübo iba amaji meinyaker, ta Rev. Dr. Wati-isa ashi.
Iba sentong nung Col. (Rtd.) Aomeri Jamir, Capt. (Rtd.) T.Senka, Dr. Toshi Echa, Dr. Tongdang, aser Rongsensashi, President, NNC Asetkong Unit nungertemia o jembi.
Asür Yongkongangshi Longchar indang nüngshilung ya Süngratsü yim yanglu aser Yongkong’er kini senotsü teyari agütsü. Pa sür küm 10 ajungba den külemi pa nüngshilung saya.