Saeed-i J&K amaktsü amokmeren

Lahore, November 07 (Agencies): Jammat-ud-Dawah tongti aser Mumbai amakba nung tongti, Hafiz Saeed-i Jammu & Kashmir nung Kashmiri telungpurtemi “surgical strike” aotsü aser ibaji kodanga mamatoktettsü, ta India amokmerenogo.
Deobarnü Pakistan-occupied Kashmir (PoK) kübok Mirpur nung lokti tulu den jembidang Saeed-i, “Modi (Ato kilonser)-i pa teinyaktsü inyakogo. Anungji tang mapang ya Kashmir nung surgical strikes aotsü atema Mujahideen mapang lir,” ta   metetdaktsü.
“Mujahideen-i surgical strikes aobaji mapang talangka mamatoktettsü. Iba strike ji alimaia memetetba- India-i strike aoba ama masütsü,” ta Lashkar-e-Taiba (LeT) tentetsang, Saeed-i ashi.
Saeed tepseter nem senpet US sen million 10 agütsütsü ta sangdonga lir.
India-i Pakistan occupied Kashmir (PoK) nung surgical strikes aoba sülen Saeed-i Modi sorkar amokmerena, Pakistan army-i surgical strike aotsü, anungji renema liang, ta amokmerena liasü.
Army tenüng nung pai iba o jembiba atema Pakistan army-ia pa aitsüogo.