International Committee of Red Cross Tir, Maurer-i Yemen semdanger

Sanaa, August 08 (Agencies): International Committee of Red Cross (ICRC) Tir, Peter Maurer-i tanü Honibar nü Yemen sorkar anemertemi tashiyim agi agia aliba Sanaa yimtiba tonga aoba osang jangjaogo.
Yemen nung sorkar aser sorkar anemba Houthi telok na tsüngda tongpang kanga sashia raratsü tenzüker joko ita ka shi abensaba mapang nung Maurer-i tan Yemen semdanger lir.
“Yemen nung sorkar aser sorkar anemer na tsüngda tongpang raraba den külemi, Saudi Arabia-i aniba teloktep Arab mitkartemi par tayimtsü amshia Houthi tesep balala amakba ajanga tai maketba Yemen nüburtemi ajurushiba timtem toushi tia den sentakba osang tali jangjashitsü nükjidong nung ozü lenisang, Maurer-i tanü nungi tenzüka taruba Hombar nü tashi Yemen semdangtsü maparen tenzükogo,” ta ICRC ketdangser kati tanü metetdaktsü.
“Yemen nung tongpang raratemi mozükitem amakba den külemi, mozü ketdangsertem tepsetba kuli ngua lir,” ta shia, Yemen tongpang raratsü tenzükba sülen tanü tashi nung ICRC ketdangser 4 tashi asüba bushitetba osang ka ketdangsersangi ashi.
Arab lima tentetba linük rong nung sensaktiba, Yemen nung tongpang kanga sashia raraba ajanga par nüburtemi nungdakba chiyongtsü aser mozümora monguteti tang kanga timtema aliba osang bushiteta lir.
Saudi-i aniba teloktep Arab mitkartemia par tayimtsü amshia Houthi teseptem taküm March ita nungi tenzüka amakba ajanga Houthi züngsem aika tepsetba den külemi, tai maketba Yemen nüburtem nema timtem toushi tia bener arutsütsü tenzüka lir.