Temeimtsü Gari

Anogo ishika tsüngsang mejungi kümer tzünglu aruba agi Nagaland nung aliba gari lenmangtem nung tesenzü mejungi kümogo. Gari lenmang kar dak alaka, Nagaland nung aliba gari lenmangtem aika akhidang yangluba sülenbo khen danga meyangludangi arubatem dena lir. Asükwa mapang ayong nung tzü kongadoker mesüra rosepadoker aliba ponglang nung senzür ama Nagaland nung gari lenmangtem aika indang tia lir. Ano, tesem kar nungbo tzülu nung mo atemba mapang mesüka gari lenmangtem nung motsü agi süia moteti lir. Mapang kabo, garitem ya tulur aser takartem atema dang ta lir ta tangatetba ka liasü, saka tanü alima ainba den asenoki tsüngsü medema anidakdang aser mapang arrshia litepba mapang ka nung joko gari ya tulur-takar aser sensaker tebendang makai, nisung ajak atema tongtipang nüngdak ka kümogo. Tanü-asüng tulur-takartema pei yari, sensakertema pei yari ta garitem alitepa amshiteper aser joko gari lenmang nung nisung dang nungibo gari ang masem senzüteper. Iba ama mapang ka nung tawa Nagaland nung ozüng alema totzü meyoktepba ken o tulu ka adoker, bushisüngdang ka tenzükogo aser tang tashi ano tembangba mebushitet lir. Gari nung arongba totzütemji petrol aser diesel na lir aser gari yangluba company temi item totzü arongba kol tem enoka garitem yanglu, saka Nagaland nung amshiba gari totzü jibo khenyongi balaka lir, kechiyong iba totzüji petrol aser diesel nung kerosene den Zero Sulfate ta ajaba chemical meyoktepba lir. Iba ama totzü tamajung amshiba ajanga gari indang kol melamela raksar. Küm ana-asemka tejaklen Naga nunger lanur kari Nagaland nung gari lenmangtem mejungi aliba atema süoki ia bilema gari lenmang nung tzü atsüngdena alidak ango apur jilu benshia sorkar ajungmesotsü merang. Ajisüaka, iba mapang tu parnok kari dang ola adokba dak alaka tanüngba Naga nungertemi ola balaka madok aser zübazüba dang toktsü. Shibai metet, Nagaland nung nütsüng yongsük kübok shilem ishikati dang ola adokba agi sorkari iba takhangba magizük südi, kechiyong iba mapang tu Naga nunger public-i ola tesashi adoka pusema nungit asübo tanü asen gari lenmang tia ya terabo tajungba kümer lila. Ano, taküma ozüng alema totzü meyoktepba inyakyim jungkai adoka putetba sülen nisungtemi iba inyakyim anema ola adoker. Iba dak sendakba nung temulungertemi Coordination committee on Fuel adulteration (CCoFA) ta ser telok ka tentet aser parnoki sorkar nem takhangba agüja, iba inyakyim nokdangtsü asoshi mapa inyaker. Ajisüaka, tanü-a nütsüng yongsük nungi shilem ishikati dang ola adokba dak alaka tanüngba Naga nunger public-i ola tesashi adokba mangur. Gari lenmang tamajung nung totzü tamajung enoker amshiba garitem tiaji temeimtsüka lir. Iba ajanga asenoki meteta aser memeteti amajok nung sen aika enokdar. Kechiba tanü iba onük shinür, ta süra, asenok Naga nunger dak ‘kecha masüar’, ‘odang tokjang’, ‘aibelenertem akoksar anentsü ati’, ‘Tsüngremi ajak ngudarji, mapang tetemjen ka nung langkabosa ataloktsüar’ ta asüba tangatetbatem lir. Iba jagi aiben asen loktiliba nung nüngdakba temelenshi madoker aser lokti dak sendakba tongtipang onük aika mapa mekümteti tembanger. Hao, Khristan tamanger tajung ka ama, asenok dak temeim, aria bilemtsüba, tatok agütsüba, tamajunger den kasa metoktepba tangatetbatemji alitsüla aser iba tangatetba nung alibaji junger. Sakasa, mapang tapet nungbo asenoki tajung dang tajung aser tamajung dang tamajung ta shitettsüla. Ajak dak alia, Lai o tesayuba nung aibelenertem metongshitsütsü, temenen mapa inyakertem angatetdaktsütsü, lokti den mapetba mapa inyakertem nem tesayuba tajung agüja meyipdaktsütsü tetuyubatem agüja lir. Anungji, asen lokti ajungtsü atema nisung kari ola adokdang, tanüngba nisungtemia iba olaji tuluba kümdakja pusema nungittsüla. Atangji, Nagaland for Christ ta ayimoktsüba yimyim sülen anidakdi ta süra, asen loktiliba nungi ochimashi mapa ajak mezüng agientsüla aser iba mapa nung na aser ni külemi longjemer inyak nungang takok angutsü.