India ketdangser 3-i Pak toktsüogo

New Delhi, November 08 (Agencies): Tanü India-i Islamabad nung aliba Indian High Commission office nung ketdangser asem Pakistan nungi anir aruogo.
Parnoki Pakistan anema mapatem inyaker ta par linüki tai tonglokja liasü.
External Affairs Ministry osang ka ajanga ashiba agi, Islamabad nung aliba High Commission nung inyaker ketdangser asem linük tonga aruogo, aser ano ketdangser pongu anir arutsü atema ano telemtetba agia mali, ta metetdaktsü.
November 3 nü Pakistan sorkari High Commission nung inyaker India nunger nisung 8 tenüng sangdonga liasü, aser parnoki Pakistan anemba mapatem inyaker ta tai tongloktsü. Parnok tipronglaji India’er Research & Analysis Wing (RAW) mesüra Intelligence Bureau (IB) atema inyaktsür züngsemtem lir ta Pakistan-i tai tongloktsü.
New Delhi nung aliba Pakistan High Commission nung inyaker ketdangser ka India-i apuba aser linük nungi mientokba sülen Pakistan-ia India ketdangsertem nem tai tonglokja parnok ti tenüng sangdonga liasü.
Osang ajanga ashiba agi, ketdangser asem– First Secretary commercial Anurag Singh, Vijay Kumar Varma aser Madhawan Nanda Kumar nunger tanep Islamabad nungi Emirates tayimtsü nung Dubai-i aoba sülen yang nungjagi India-i aru.
Tanüngba ketdangser ponguji – Rajesh Kumar Agnihotri, Amerdeep Singh Bhatti, Dharmendra Sodhi, Balbir Singh aser Jayabalan Senthil nunger lir aser parnok Wagah arrtsü adena India-i arutsü, ta kasa osang ajanga ashi.
Ajisüaka India sorkar nungibo iba atema official sangdong kecha mali.