London tram lendong nung 5 tsükset; tanishisang apu

London, November 09 (Agencies): Britain yimtiba, London anülulentip tsütsülen nübur tesem ka nungi tesem tangai anir senzüba tram ka intep nungi lungteta tugua lendong tanü, Bodbar nü ajuruba osang ka London police-i metetdaktsüogo.
“London kübok central Croydon nung tram ka talungtsü intep nungi lungteta tugua tanep 6:10 akok meta lendong ajuruba osang angazüka liasü,” ta British Transport Police (BTP) nung Assistant Chief Constable, Robin Smith-i osang jangjashitsü.
“Tan lendong nung nisung 5 tsüksetba, nisung 50 dak tema yiruba aser nisung 2 tashi tram-i nenbanger aliba osang tang tashi nung jangjaogo. Tan lendong nung yirurtemji mozükidangi anir ao anepaluba osanga angazükogo,” ta pai ashi.
Tan lendong ataloka, nisung 5 tashi tsükseta südaktsüba ken o nung ajemdaker, tram anishisang pua ayuba osang ka BTP otongdar katia metetdaktsü.
“Tan lendong nung yirur nisung 51 tashi mozüki balala nung anepalutsü tenzükogo. Tan lendong atalokba sülen lendong ajurushir yaria, parnok taküm kümzüktsü nükjidong nung fire engine gari 8, specialist rescue telok 5 aser firefighter nisung 70 dak temai lendong atalokdak kanga meranga inyakogo,” ta pai shiem.
Tan lendongji kechi timtem ajanga atalokba iba osang jangjatsü atema bushisüngdang sentong tenzükba osanga angazükogo.
“Croydon nung atalokba tram lendong nung densemertem atema sarasademtsür. Tan lendong atalokba atema kanga sasar,” ta Britain Ato Kilonser, Theresa May-ia metetdaktsüogo.