IAAF Awards atema Bolt o Thompson na shimshir

London, November 09 (Agencies): IAAF World Athlete of the Year sempet agütsütsü asoshi tajemba küma shimshiba asayar tenüng tarensen nung Jamaica nunger Usain Bolt aser külem sensotsür, Elaine Thompson na tenüng densemba osang ka tanü, Bodbar nü sangoktsüogo.
Kasa tarensen nung Rio Olympics nung 10,000 meters takokba angula, Ethiopia’er tetsür distance runner, Almaz Ayana tenünga densema lir.
Taoba mapang IAAF sempet 5 ben tashi agizüksang, Bolt-i Brazil kübok Rio de Janeiro nung taküm August ita agiba Olympics asayamong nung 100 aser 200 meters Olympic gold medal 3 ben tashi atonga agizüker toktepa asemer mezüngbuba küma, otsü tasen yanglua liasü.
Thompson-ia Bolt-i ajangzükba ama tetsür 100m aser 200m tetoktepba gold Rio nung agizüka kangasa junga shilem agi.
Ayana-ia 29:18.45 mapang nung 10,000 m alizüng mezüng tonga, küm 23 tashi majangteti aliba tekaratiba mapang nung 10,000m alizüng atongba otsü ajangtetba den tetsür 5,000m tetoktepba nung bronze medal agizüka liasü.
Bolt den külemi, taoba mapang 5,000 aser 10,000 meters Olympic champion akümtsü jenjang 2 ben tashi ajangzüker, Britain nunger Mo Farah aser 2 ben tashi 400m Olympic champion akümsang, South Africa nunger Wayde van Niekerk na IAAF sempet agütsütsü atema shimshiba asayar tenüng tarensen nung densema lir.