Australia-i Paris climate tezüngzüktep mapa küma inyaktsü nangzükshir

(Abelen nungi achijileni tarensena) Australia Foreign Minister, Julie Bishop; Ato Kilonser, Malcolm Turnbull aser Environment Minister, Josh Frydenberg nungeri osangbener den Canberra yimtiba nung ajurua, par Australia linüki yaküm, 2015 küm France yimtiba, Paris nung agiba climate tezüngzüktep mapa küma inyaktsü nangzükshiba osang sangoktsüdang agiba noksa yangi angur. (Canberra, November 10)

Canberra, November 10 (Agencies): Australia linüki France yimtiba, Paris nung agiba alima tali tatsükba akümbaren azüoktsü tezüngzüktep mapa küma inyaktsü nangzükshiba olen ka Australia Ato Kilonser, Malcolm Turnbull-i tanü, Brehostibar nü metetdaktsüogo.
“Australia linüki alima jenjang nung agiba tenangzükba teti mapa küma inyaker aser tana ozü linüki Paris nung agiba tezüngzüktep nangzükba ama inyaktsü nangzükshir,” ta pai sangoktsü.
Alima lenirtemi France yimtiba, Paris nung yaküm, 2015 küm December ita climate senden amen aser idangji parnoki alima tali tatsükba akümba aser iba ajanga alima tsüngsang mupong balaka küma melenshidaktsübaren azüoktsü nangzüktepa liasü.
Iba tenangzükba agiba sülen Tir Barack Obama-i aniba US linüki Paris nung agiba tenangzükba mapa küma inyaktsü nangzükshir alima linük rong nung mezüngbuba linük aküm.
Ajisüaka, tawa Tir election nung takok ngua, 45 buba US Tir akümtsü temeten angusang, Donald Trump-i iba tezüngzüktep yanglushir tanaben agishitsü mesüra par US linüki tezüngzüktep agibaren nung shilem magitsü amokmerena lir.
Par alizüng asangsang nung atalokdaktsütsü nükjidong nung Australia Foreign Minister, Julie Bishop aser Environment Minister, Josh Frydenberg nati Morocco kübok Marrakech nung taruba hopta amentsü ayongba UN climate senden nung shilem agitsü renema lir.
Yaküm Paris tezüngzüktep agir rong nung alima linük 100 shi densema lir aser parnoki miim aketba greenhouse tango noklang nung shilem 75 agi tajemba kümdaktsütsü nangzüka lir.