Pak-i sen note tasenba meyanglutettsü: Intelligence Agencies

November 10, 2016 nü New Delhi nung nüburtemi bank nung Rs 500 aser Rs 1000 note tejen melenba sülen Rs 2000 note tasenba sayuba noksa nung angur.

New Delhi, November 10 (Agencies): Intelligence agency temi, sen 2,000 aser sen 500 note tasenba nung security features ji Pakistan-i reprangzüka meyanglutettsü, aser joko mapang talangka ozüng alema inyakba networks tashi maittsü, ta ashi.
Osangbenertem den jembidang sorkar ketdangser tongti kati, external intelligence agency Research & Analysis Wing, Intelligence Bureau aser DRI-i tesüiba ita trok miima menüngba features temji reprangogo, ta metetdaktsü.
Ketdangseri notes nung security features bo mashi saka itemji reprangzüka yanglutsüji kanga tasak asütsü, ta ashi.
Intelligence agency temi sorkar aser Reserve Bank of India (RBI) dang, Pakistan-i Peshawar yimti nung sen taila menüngtsü atema press ka tenteta lir, aser yangji India sen taila, talisa sen note 500 aser 1,000 menünger, ta metetdakja liasü.
Pakistan’er intelligence agency ISI (Inter-Services Intelligence)-i ketdangsüa sen taila menüngbaji repranger aser item senji networks balala atema amshir, item rongnung Dawood Ibrahim aser LeT densema lir.
Sorkar aser RBI nem agutsüba report nung Intelligence agency temi, küm ishika tejaklen India sen taila menüngtsüsa Pakistan machinery-i “zero-error counterfeit capability” jenjang angu, ta shia lir.
Agency temisa ashiba agi, küm shia Pakistan-i Fake Indian Currency Notes (FICN) sen crore 70 shi India dangi yoker, aser ibaji kiralongraba atema amshir.
Union Minister of state for Home, Kiren Rijiju-i, sorkari iba telemtetba agiba ajanga Pakistan nung aliba sen taila menüngba printing press shibangtsüsa akumtsü, ta shiogo.
Ano tanga osang ka nung Modi’er sorkari sen note 500 aser 1000 note anentsütsü telemtetba agiba anema Bombay High Court nung PIL ka benokogo.
Iba PIL nungji, “Ato kilonseri sangdongbaji black money, sen taila aser kiralongra nokdangtsü atema lir ta shiogo, ajisüaka iba rongsenkettsüng tensa ajanga India nunger niusng billion 1.25-i timtem ajurur, aser ibaji sensakertem anema ‘rongsenkettsüng kiralongraba’ asütsü,” ta shia lir.
Bodhbarnü advocates anati Bombay HC-i oa Rs 500 aser Rs 1,000 notes anentsüba anema temepishiba ka benok.
Advocates- Jamshed Mistry aser Jabbar Shaikh nati, iba telemteba ya ozüng kübok tim masü, ta ashi. Temepishiba angadangba sülen obendangeri tena dang, iba temepishibaji sodi tembangba sülen angadangtsü, ta shiogo.
Advocate Mistry-i ashiba agi, “Sorkari sen aika indang notes anentsüba tesüsabubaji 1978 küm liasü, aser ibaji ozüng ka… Act ka akümba sülen ang mapa akum.”