Kerry Antarctica semdanger yimsüsür tongtiba akümer

Mcmurdo Station, November 11 (Agencies): US Secretary of State, John Kerry-i Antarctica tanü, Hokolbar nü semdanga, par US yimsüsür rong nung Antarctica semdanger tongtiba yimsüsür kümogo.
Kerry-i tan anogo 2 agia Antarctica semdangdang, Antarctica nung monga alir scientist-tem den tsüngdong ajurutepa, rüjep agi nembanga aliba Antarctica continent nung alima tali tatsükba akümba ajanga temelenshi bener arutsüba den sentakba osangtsüsang agitsü sentong lir.
Tsüngsang majungba ajanga Kerry-i New Zealand nung anogo 1 anenzüka lir külen tanü Antarctica tonga aoba osang angazükogo.
Kerry aser pai aniba ketdangsertemi Christchurch airport nung C-17 Globemaster ta ajaba mitkar osettsüset abenba tayimtsü kati tanep 6:00 ako meta ayaketa atuba sülen Antarctica kübok Pegasus Ice Runway tanep 11:00 ako meta tonga ao.
Pai Antarctica bushia aoba jakdang Kerry-i tawa US Tir election nung takok ngua, US Tir tasenba akümtsü temeten angusang, Donald Trump den pela osang lemsatepa liasü.
Kerry-i tanü McMurdo kübok Pegasus Ice Runway tonga aoba sülen US sorkari South Pole nung tentetba research station semdangba osanga angazükogo.
Kerry-i taoba mapang US Senator aser tang US Secretary of State yimsüsütsü menden abendang par US linüki alima tali tatsükba akümbaren azüoktsü mapatong nung tongti shilem agitsü alizüng yur, par alizüngji asangsang nung ajangzüktsü atema bendang agüja inyakba osang bushiteta lir.
Kerry-i Antarctica semdangba sülen maneni New Zealand-i shilanga, par Ato Kilonser, John Key den ajurutepa senden ka amenba sülen taruba hopta Middle East semdangtsü sentong renema lir.
Kerry-i maneni Morocco linük nung amentsü asoshi UN-i ayongba Global Climate Conference nunga onük jembia shilem agitsü sentong renema osang angazükogo.