US-i Women’s World Cup takok marok agizükogo

US tsürtemi goal 5-2 agi Japan madak final asaya nung takok ngua FIFA Women’s World Cup 2015 takok marok Canada kübok Vancouver nung agizükba sülen pelatepba noksa nung angur. (Vavcouver, July 06)

Vancouver, July 06 (Agencies): Captian Carli Lloyd-i hat-trick yangluba densema lar US teloki goal 5-2 agi defending champions, Japan madak takok ngua FIFA Women’s World Cup 2015 takok marok yashi Deobar nü agizükogo.
Lloyd-i asaya tenzüker minute 14 buba tashi nung goal 3 tashi agütsüba densema lar US teloki World Cup final nung goal timba agütsüba otsüa yanglutetogo.
Yashi asaya tenzüker minute 3 buba nung Megan Rapinoe-i yanglutsüba cross ball agizüka Lloyd-i lar telok asoshi mezüngbuba goal agütsü.
Mezüngbuba goal agütsür minute 2 süir külen, asaya tenzüker minute 5 buba nung Lloyd-isa lar telok asoshi tanabuba goal agüja lar US temaba jenjang nung ajungkettsü.
Ano, minute ishika lir külen, Lauren Holiday-i metsüba free kick ball agizüka Lloyd-i lar US telok asoshi tasembuba goal agütsü.
Asaya tenzüker minute 14 buba nunga Japan asayar, Azusa Iwashimizu ket nungi ball rakzüka Holiday-i lar telok asoshi 4 buba goal agütsü.
Tesülen, asaya tenzüker minute 30 buba abensabatsü mapang nung Yuki Ogimi-i lar telok asoshi goal ka agüja lar Japan telok jenjang tajungba kümdaktsü.
Yashi asaya tenzüker minute 52 buba nung US defender, Julie Johnston-i ball nokdangtsü merangdang la tekolak nung ball onshia ball-ji gaolpost telungi aiba yong Japan-i goal 2-4 ngua jenjang tajungba ngutet.
Ajisüaka, Morgan Brian-i lar telok asoshi 5 buba goal agütsüba yong lar US-i goal 5-2 agi Japan madak final asaya koka takok marokji agizük.
US tsürtemi tan takok anguba ya taoba mapang, 2011 final nung Japan madak takok mongutetba kepzükba den külemi, tan agi Women’s World Cup takok marok tasembuba agizüktsü maongka tulu nguteter lir.