Mapa tulu atema tila nüngdaker

Alimaibo tuluka aser aika nung dang temulung alemer saka Tsüngremi aiben Pa tashi aser Pa temeim sayutsü atema tilaka aser ishika nungi tenzüker. Yisui kotak yimli indang o entepba jembidanga kotak yimliji tilaka agi dang atishia jembi. Asenoki bilemtsü agibo, kotak yimliji tuluka aser tesüngmangtsü tobur tajung agi atishia o entepba ka ashitsü amai bilemtsü südi. Saka Yisui ashi, ‘Kotak yimliji jibi metsüjang ka mesüker…… Ibai metsüjang tilatiba saka kodang aji ainer tsünüsembongtsü ajak dang tuluba akümer…anungji anüng ozütem aruagi iba kongsang nung alir.” (Mathi 13:31-32). Ano, Yisuisa ashir, ” Kotak yimliji piyazü mesüker,” (Mathi 13:33). Iba piyazü jagi am tila ka nungi amtsük tulu ka küma pokraka atudaktsür.  Atangji, jibi metsüjangji kanga tila saka kodang ibaji ainer, Yihuda lima nung balaka, ibaji süngdong küma ainer, anungji ozütem aruagi metsüjang tilaka nungi adokba süngdong kongsang nungji anisüngzüker. Aji oda, asenok kotak yimli angutsübaji tamasayongi takar aküm nung dang mesüra tulur aküm nung dang angutsü amai bilema alitsü akok. Kotak yimlijibo tangar ajaki junger ta tenük sünga repranga aliba nisung aser kibongiang angutsü amai asenoki bilema alitsü akok. Ajisüaka, Yisui ashir, kotak yimli angutsübaji tila ka nungi tenzüker. Nü dak tangari manguba sempet tilaka alitsüa akok mesüra nür kibongi inyaktettsüba mapa tajung tila ka anünga alitsüa akok. Ashiko, itemji nür atema kotak yimli mesükba metsüjang aser piyazüji asütsüa akok. Iba sempet tilakaji aser aseni inyaktettsüba mapa tila ka jagi asensasa asen tenükmesüngi malitsüla. Onsara tila asünungji, aiben asenoki essh ! ya kechi sütsü ta bilemer. Saka Tsüngremi nü taküm aser nür kibong ajanga mapa tulu inyak tenzüktsübaji nai tenük mesüngi yutsüba sempet, jala jabaso, tsürabur aser mapaji asütsüa akok. Tsüngremi tuluka nungi tuluka kümdaktsüba nung temulung masür saka jibijang ama tila ka nungi süngdong tuluka kümdaktsüba aser piyazü tila ka agi amtsük tuluka poraka atudaktsütetba ama, tila agi tulu küma inyaktetba mapatem nungang Pai Pa taochi aser tashi sayuner. Alima nung kodangsa nübortem timtema alaashi tia nung liasü, itemji anitettsü atema Tsüngremi chubatem mesüra tulur aser takar metenya saka kibong tila nungi kinü tanur kümer Mosa aser Yohan Baptitsüba nunger ama yok. Aji oda, Yisua tamasayongi anüng len nungi mepet langpang mener nisung ajaki akümtsübutsüsa maru saka tilar kibong ka nungiang kinü tanur kümer aru. Kodang, lokti tulu adenshia yur chiyongtsü maka aküm, pai dokan nungi chiyongtsü peria bener arudaktsütsü koka liasü,saka tanur ka ket nung ango ana aser amtsük pongo bena aliba chiyongtsü tilaka nung jagiang aika küma ajak peria chiyonger anüngtsüsa moatsü. Kotak yimliji ibaji aser asenoki anogo shia  iba yimliji arung ta sarasademer. Asenok taküm aser kibong nung tepela malitsü akok saka asenoki akokba o tajung tila kati  mesüra tilaka aremzükba agi, memeteti tepela tulu arur alitsü. Asenoki aiben aika aka nung dang pelaa alitsü amai bilemer mesüra aika asünung dang akoktsü amai bilemer saka Tsüngrem bilembajibo yamaji masü. Israel nunger Media nungertem anema rarai yokdang Tsüngremi Media nunger meyirijang aika den raratsü atema Israel nunger sepai noklang asem dang yok aser akok. Yisui Pa den yariteptsü atema nisung 12 dang shimtet. Ibai tesüngmangtsüka lir. Aseni asübo nisung 12 masü meyirijang ter ana shimla ta bilemer. Ajisüaka, Tsüngrem bilembaji yamaji masü. Aika asüba agi masü saka ishikati süaka, Pa den temulung lemtettsüsa jajara item jagi alima akoker ta Tsüngremi asenok nem angatetdaktsüner. Aji oda, nai na tilar ama bilema alitsüa akok mesüra na akaba agi nai tenük mesüngi bilema alitsüa akok, saka na jibijang dang nungibo tuluba aser piyazü dang nungibo tashi taitba. Tilaba asüba agi pelaang kechiyong Tsüngremi na amshitsü aser tuluka küma moatsütsü.