Pastorbai Tsüngrem dang Naga nunger mapa, jakla aser yimya agi Tsüngrem pelar asü mepelar asüngdanger.- Vol II

Pastor : Oh! Tsüngrem na ajak teyanglusang, ozü Nagaland nungbo dept ishika nung mapa inyaker ita sen, ita 7, 8, 9 tashi Govt.-i magütsüteter. Na pelar asü mepelar?
Tsüngrem : Nashi punchi mo anetdang nai tebang tenembang. Kechiaser inyaker pei taa angutsü tetemsü. (T.Kunem 25:4, I.Tim 5:8)
Pastor : SSA tesayur meyi ana sür noklang troki ita sen agüjang ta lungkak aita nokdaka alidang sen melen, Tzü ang kaloktsü. Nai koda reprang?
Tsüngrem : Pei jabaso amtsük ka meshi nung, pa nem lung ka agütsütsü; mesüra pai ango ka meshi nung pa nem per ka agütsütsü, nenok rongnung nisung shiba lir? (Mt.7:9-10)
Pastor : Nagaland Govt. dang, lenmang yanglujang ta Naga kin ajaki ayimtenaka kecha telangzüba mali. Na pelar asü mepelar?
Tsüngrem : Nenok lenmang masü, nenok temulungjang yangluang, meshitetang, aser tashi agi ayimtenang. Kechiaser ajak dak alaka temulungjang tekülakba lir, aser onsara majung. Ni kibuba temulung bushir aser temulungjang tendanger. (Yakob 4:8, Yer 17:9-10)
Pastor : Ozü Nagaland state dang Dry state ta ajar, saka ozü lima nung yi (Wine) ayoker, aser yi ajemer onsara kümogo. Na pelar asü mepelar?
Tsüngrem : “Jemkanga jemang aser saktsüang, laoang aser joko teshishi, nok koba ni nenok rongnung yokdagi iba yongji lir.” (Yer 25:27)
Pastor : Ozü India lima nungbo November ita nung takartemi sen Crore aika yimdong nung mi agi rongdoker. Na pelar asü mepelar?
Tsüngrem : Kibuba terasaba anogo nung parnoki taribi aser hon yimdong nung endokadoktsü, aser parnok hon memerükba oset ama alitsü; aser hon agi parnok mekümzüktsü, parnok pei tanela jangra metemdaktsütsü mesüra parnok tepok mesüngdaktsütsü; kechiaser aji parnok tai menaba temetsüdaktsü lung lir. (Ezkl. 7:19)
Pastor : America nung President melen, aser India lima nung sen melener. Na koda?
Tsüngrem : Ni kibuba memelenshir. Yisu Khristaji yashi, tanü aser teti tatem maka kasa dang lir. (Malaki 3:6, Ibri 13:8)
Lilir : Solomon, Dimapur