Park-i S Korea Tir menden toktsütsü takhangba tesashiba benokshir

South Korea yimtiba, Seoul nung S Korea nübur meyirijang jenti par Tir, Park Geun-hye yimsüsütsü menden nungi anentsü takhangba benokshia, taoba mapang dang nungi tan tesashiba longkak aitba noksa nung angur. (Seoul, November 12)

Seoul, November 12 (Agencies): South Korea nübur meyirijang jenti Seoul yimtiba nung longkak aittsü sentong agia, par Tir, Park Geun-hye-i lenisütsü menden toktsütsü takhangba taoba mapang nungi tesashiba benokshia, tanü, Honibar nü longkak aitogo.
Lar tembar ka nem tangar dak alia, tajangzük balaka agütsüba ken o arishi küm 64 tain Park anema benoka, lai Tir menden toktsütsü takhangba benoktsü tenzükba sülen tan ayongba longkak aittsü sentongji la anema agiba longkak aittsü sentong tulutiba aser tesashitiba aliba osang jangjaogo.
Tanü ayongba longkak aittsü sentong nung nübur nisung 850,000 shi shilem agiba osang angazükogo.
Kaketshir aser kinü tanur anisemba tsüraburtem densemba longkak aitertemi “Park Geun-hye! Tanüsa Tir menden tokjang!,” ta ayimtena tanü sentong nung shilem agia, Tir alitsü atema renemtsüba ki, Presidential Blue House tonga yimdongsüa jaja liasü.
“Tarutsü nung ozü jalatem indang taküm jenjang tajungba kümdaktsütsü tangatetba nung ni tan longkak aittsü sentong nung shilem agir. Park-i aibelena inyak aser iba yongji, lai tangasa Tir menden toktsütsüla,” ta jala 2 anisemer tanü sentong nung shilem agir, arishi küm 34 tain tetsü ka, Park Min-hee-i lemsatepa liasü.
Lar tembar, Choi Soon-sil nem maongka balaka agüja, la nem senotsü tajangzük agütsüba ken o nung ajemdaker la aitsüba atema Park-i yimjak nung taoba October ita 25 nü taidok meshi aser iba anogo nungi tenzüka, S Korea nüburtemi tanü agi hopta 3 buba tashi Park anema kanga sashia longkak aiter lir.
La anemer peladaktsütsü nükjidong nung Park-i Ato Kilonser tasenba shimtsü temetena opposition yimsüsür timba züngsemba parliament nem agütsü saka lai lenji aoba shia, nübur tali jashidaktsüba osang bushiteta lir.