St John Bosco kürakyanglu raksatsüba atema BJP züngsemtem apu

Guwahati, August 8 (Agencies) : Hokolbarnü Guwahati nung St John Bosco idnang kürakyanglu ka sensamasatsü atema Guwahati Municipal Corporation nungi councilor ka dena Assam BJP state unit züngsem pezü puogo.
Iba tatalokba atema bushisüngdanga aodang par pezüi kürakyanglu sensamastsüba nung shilem agiba kuli angu. Parnok rongrong adokdaktsüba aser police dak teka sangshiba kem o ten nung aitsüogo, ta police ketdangser kati ashi.
Parnok ajak ya yimten telok nung züngsemtem lir saka onoki iba dak merangloker. Onoki parnokji ozüng anema inyakertem ta aija apu, ta paisa shisem.
Guwahati nung Salesian Provincial puri aina agi yangluba kürakyanglu ya Hokolbarnep Sonaram high school anasa Martyrs’ Corner nung azüng aser Chief minister Tarun Gogoi-i semzüktsütsüba liasü.
Martyrs’ Corner nung Assam nunger nüjiso atema rarartem aser Assam nunger nüngtugu nisungtem indang kürakyanglutem lir.
Ajisüaka, nisung telok kati kaürakyanglu mesenmetua agizük aser anameta aliba Bharalu ayong nung endok.
State sorkari junga meshisadangi iba tesem nung St John Bosco indang kürakyanglu ayutsü temelaba agütsü. Iba nisung yagi Assam atema kecha meinyak ta nisung telok jagi aitsü.
Cotton College Union Society aser Akhil Bharatya Vidyarthi Parishad (ABVP) nungertemi anema noktakba agi iba kürakyanglu mezüng azüngtsü tesem nungi belenshia liasü.
“Asenok loktiyimten ka nung alir aser nübortemi lungkak aittsü temeten lir. Saka asen sobaliba nung kürakyanglu sensamasaba yimya mali. Iba nisung ya tamangdir ka ta züngshir aser nisung shingaia pa kürakyanglu mesenmetua amshitsü temeten mali” ta state minority commission züngse, Alan Brooks-i osangbener dang ashi.
Ano, Chief Minister Gogoi-ia “Onoki local nisungtem tebilemba angateter saka kasa mapang nung John Bosco-i shisaluyimba aser lokti atema mapa tajung inyaktsüba agizüktsüla” ta metetdaktsü.