FBI-i kü nübuyim mapa raksatsü:Clinton

Washington, November 13 (Agencies) : Hillary Clinton-i, Tir election tatembang nübuyimba mapang FBI-i kü nija server tanaben reprangdangba ajanga mapa raksatsü. Parnoki kü server reprandangdang kecha tai meputet, ta nüburtem dang ashi.
La indang national finance committee nung züngsem kati CNN den Honibarnü jembiba mapang lai, tan Tir election nung Repubican party nungi Donald Trump madak tamakok angubaji Clinton-i Federal Bureau of Investigation Director, James Comey dak terabo keta lir amai bilemer, ta ashi.
Lai, Comey-i congress dangi October 28, 2016 nü mezüng yokba shidi ajanga Clinton aser Trump na tsüngda o toktep asem tashi agiba nung jenjang tajungba nguteta aliba raksatsü, ta ashi.
Ano iba sullen anogo tokunü lir aruba tanabuba shidi nung Clinton kecha nunga aia mali ta liasü aser ibaji ajanga Trump nungitertem taliang aküm, ta laisa ashi.
Lai ashiba agi, FBI osangtem onsara tali akümba agi tejangraba ka samadaktsü. Ajisüaka iba dak alaka ano tanga tatalokba aika ajanga lai tamakok angu.
Democrats party pur aikati election sülen Clinton dak tai kecha mali ta 2009 küm la Secretary of State alidang sorkar system kübok mesüi la nija email server ka lapokba nung rangloker ashi.
CNN den jembiba mapang Clinton-i la nungitertem dang pei amangba nung metsübui mera oa inyaktsü ashi.
Aji oda süaka CNN den minute 30 shi jembiba ajakbo osangbenertem dang mashi.
Democrat züngsem tanga kati, Clinton-i iba tamakok ya temulung raksatsüka lir, ta ashiba metetdaktsü.
Iba sensaksem mapang Clinton-i Trump atema kecha balaka mejembi ta osang ajanga ashi, ajisüaka lai maneni rara tajung raratsü ashi.