Colombia: Sorkar & FARC nati yimjung tezüngzüktep agishir

Havana, November 14 (Agencies): Colombia sorkar aser sorkar anemer teloktem rong nung telok tulutiba, Revolutionary Armed Forces of Colombia (FARC) na tsüngda tanaben tajungba küma renemshiba yimjung tezüngzüktep ka agishiogo.
Par telok anati ita ishika tejaklen tongpang raratsü anena, yimjung nung alitsü tezüngzüktep agia liasü saka nübur ajungaibo iba tezüngzüktep magizükba yong tezüngzüktepji tajungba küma melenshir tan tanaben agishir lir.
Tan agishiba tezüngzüktep nung telok balalai benokba onüktem tongtipangsüa enoksemba osang ka Marxist yimtenren inyakyim benshir guerrilla telok, FARC aser Colombia sorkar naprongi jangjashitsüogo.
“Tan tezüngzüktepji taoba tezüngzüktep den kanga agi tajungba lir,” ta sorkar anemertem den takok ngua yimjung tezüngzüktep agiba nüngtem nung taoba October ita Nobel Peace Prize agizüksang, Colombia Tir, Juan Manuel Santos-ia metetdaktsü.
Sorkar tenüng nung o jembitsür tongtisang, Humberto de la Calle aser FARC telok tenüng nung o jembitsür, Ivan Marquez ta ajasang, Luciano Marin nati tan yimjung tezüngzüktepji Cuba yimtiba, Havana nung zülutepa agia liasü.
Tan yimjung tezüngzüktep tajungba küma agishiba atema pelaba olen ka United States sorkaria Colombia sorkar den lemsatepogo.
“Tan FARC aser Colombia sorkar nati yimjung tezüngzüktep takok ngua agishiba ajanga par linüki yimjung asangsang nung angutsüsa tongti mera agir lir. Colombia nung teti yimji yimjung lidaktsütsü atema US-i Colombia sorkar maneni nungita yaritsü nangzüker,” ta US Secretary of State, John Kerry-ia metetdakja liasü.
Colombia sorkar aser sorkar anemer na tsüngda taoba küm 52 tashi tongpang rara, nisung 220,000 shi tepseta lendong atalokdaktsübaren anenja, par linük nung yimji yimjung tia asangsang nung lidaktsütsü nükjidong nung tan yimjung tezüngzüktepji agishir lir.