Jharkhand:Maoist temi nursing home ka kibur tepset

Ranchi, November 15 (Agencies) : Mongulbarnü Jharkhand kübok Seraikela-Kharsawa district nung Maoist telungpuri nursing home ka kibur dang parnoki ozüng alema sarutetba sen pa indang bank account nung inoker ochi sen kümdaktsütsü memulungba ajanga iba nisungji tepset, ta police osang ka ajanga metetdaktsü.
Kasa osang ajanga ashiba agi, Maoist telok jagi nursing home kibur, Yogesh Mishra aja aser pa kahseta yutsüba sülen Ranchi nungi kilometre 130 pilar aliba Kuchai nung pa indang garia rongtoktsü.
Petrol pump ka kibur-a iba amala mapa inyakba atema pua benerogo ta shia Mishra-i item telungpuri ashiba manga.
Mishra-i Maoist telungpur meima benshiba atema police-i aitsü aser police ketdangser tain ka dak akahba atema Maoist züngsem ana par nursing home nungi pua anir ao.
Jharkhand nung aliba Security agent tem tang ya kanga saksalema aser yakyaka Maoist telok tem ochi mashi sen meleni aruba aputsü atatepdar.
November 10, 2016 nü Ranchi tezülen aliba Bero tesem nung petrol pump kibur Nand Kishore sen lakh 25 bank nung inoka ayutsü arudang police-i apu.
Pa dang asüdangyaba mapang Kishore-i, iba senji shibangtsür aliba People’s Liberation Front of India (PLFI) telok nung lenir Dinesh Gope meyong lir, ta rakpoka ashi.