BJP tebilemba ya kechi ?

Tang Nagaland nung yimsü tesüdak Democratic Alliance of Nagaland (DAN) government nung BJP telok ya tongtibang telok ka lir. Tetenzükdang nungi NPF teloki aniba DAN telongjem nung ya BJP dena liasü, anungji DAN government-i tajung inyaka lira BJP teloka tenüngsang angutsü aser mejungi inyaka lira BJP telok asoshia nüngsen alitsü. Aji oda, tajung süli, tamajung süli DAN sorkari inyakba nungi BJP ajentsü makoktsü. Ajisüaka, taoba hopta nung Nagaland nung BJP teloki DAN sorkari ochimashi mapa inyakba indang tezüluba nung Nagaland angh nem agütsübaji nübortem asoshibo temangmangtsüka lir. Atangji, government nung dena liaka tai dang tai ashitsübaji tim, iba jagi nübortem ajangzüker, saka talisa Nagaland nung government nung alir telok kati government anema ola adoktsübaji kanga meimlaba mapa ka lir. Tang Nagaland tatar senden nung opposition mali, anungji government majung jembirbo mali, iba jagi tatar senden nunga tejembitsü maka taoba sendenbo minute 15 nung Nagaland tatar senden temadokba tanü tashi jembir aser ibaji alima nung otsü asütsü. Ajisüaka, tang ita ishika tsüngda tatalokba kaji DAN government nung shilem tajung agi ataa alir BJP teloki DAN sorkar majungba   aser ochimashiba indang jembiba ya asütsü. Aji oda, Nagaland BJP unit nung lenirtemi DAN sorkar majungba indang jembibaji parnok nem tagitsü temulung süa melemzüktsüba agi asü mesüra shitakba nübortem meima government-i yimsü südaktsünüba agi jembir ta nübortemi parnok jakla reprangtsü tenzükogo. Shitakba agibo BJP teloki DAN government-i tim mesüi ochimashi inyakba indang yimjak nung aitsür süra aser iba kasa taitsüba ken o ji angh nem tezüluba nung agütsür süra idangjisa DAN government nungi BJP adokadoktsüla. Ajisüaka, DAN government-i ochimashi inyakba indangbo aitsür saka ochimashiba government nungibo mepilatetter ta süra BJP purtemjia DAN telongjem  nung dena aliba tangar yimten teloktem den kecha balaka masü, kasasa ochimashi aser tim masü mapa inyakertem yongrü nung arütsü. Atangji, BJP state unit-i dang masü saka Nagaland government nung yimsüsür aser ketdangsertemi ochimashi mapa onsara inyakba indang Nagaland angh-i yimjak nung anogo shia pa aolen jembir. Aji oda, Nagaland tatar senden nung opposition meliaka Nagaland angh aser BJP teloki opposition ama Nagaland ajungtsü mechi shilem agi tenzükogo. Atangji, government nung alirtema pei pei department nung pei bilemba mapa kecha meinyaktet timtemba angur. Ibaji tamasayongi Nagaland nung inyakyim (system) ajak raksar pei sünütsü süa mapang talangka aruba ajanga lir. Item inyakyim ajakji tanaben tasensa shitak küma meyanglutet tashi Nagaland junga meyanglutettsü. Aji oda, tang amai DAN sorkar nung dena aliba telok BJP teloki government anema jembiba den külemi Nagaland angh-i dena tashi tulu akaba yimsüsürtem shirnoki ochimashi mapa inyaker, item nemji nübortem tan asütsüsa temerenshi agütsütsüla ta state tesem balala nung jembia senzür. Atangji, state nung shiba angh südir süang center government-i mulungba ka shimer yoker, anungji Nagaland angh ya center nung BJP teloki kanga temulung lemtetba nisung ka shimer yutsüba lir. Aji oda, BJP dena liaka Nagaland nung DAN government ya tang amaisa terenlok mapa inyakmong kecha maka aser tenzükertem nem ita senbo magütsütetter ta ora, ashiko memenui angh-i center dang President’s Rule yoktsü asüngdangtsüa akok. Tang DAN government kümsük küm pongo atemtsü anasai arur, joko parnok asoshi senotsü sentong yangtsüluba senden (budget session)-bo ka dang anünga lir. Iba sülenjibo kechi asütsüar memetet. Iba ama mapang ka nung PR arunungbo kanga jungla ta bilemer. PR arunung dang tang Nagaland angh-i jembia senzüba ajak ya mapa küma inyaktettsü. Aji oda, PR mapang nungang tang Nagaland BJP teloki aija metetdaktsüba ama ochimshi inyaker department ajak meshitettsü aser ochimashirtem tan asütsüsa merenshitettsü.