Turkey tesayurtemi Pak toktsütsü ozüng agütsür

Lahore, November 16 (Agencies): Pakistan sorkari par linük tentetba school balala nung tesayur inyaker Turkey senso nisung 100 dak tema aser parnok kibongi tan November ita 20 nü tashi nung Pakistan linük toktsütsü ozüng ka agütsüogo.
Par linük semdangsang, Turkey Tir, Recep Tayyip Erdogan peladaktsütsü nükjidong nung Pakistan sorkari Turkey tesayurtem meindoktsü tenzükba osang angazükogo.
“Pak-Turk school-tem nung tesayur inyaker Turkey senso aser parnok kibongi anogo 3 tsüngda nung ozü Pakistan linük toktsütsü ozüng agütsüogo,” ta Pakistan interior ministry-i osang jangjashitsü.
Pakistan nung tentetba Pak-Turk school-tem nung Turkey senso nisung 108 shi tesayur inyakba osang bushitea lir.
Taküm July ita tamakok ngua, Turkey mitkar telok kati par linük yimsüsütsü tashi tashiyim agi agitsü merangba ken o nung ajemdaker aitsüsang, US nung jenoka alir tamangba yimsü putir, Fethullah Gulen aser pai aniba telok pusema nungitba ken o nung ajemdaker, Turkey sorkari asüngdangba ama, Pakistan sorkari par linük tesayur inyaka alirtem nem Pakistan nung maneni alitsü temeten agütsüshitsü maparen nokdangba osanga jangjaogo.
“Pakistan sorkari tan ajungbena ozüng tesashi agütsüba angazüka, kanga dang aoksar aser Pak-Turk International Schools & Colleges-i tebilemtsü akar,” ta Pak-Turk Education Foundation Board of Directors nung Chairman, Alamgir Khan-ia metetdaktsüogo.