IS teloki Kabul nung bomb pokdaktsü; 4 pokset, 10 shi yiru

Kabul, November 16 (Agencies): Peisasa pokseta asütsü mulungteter kiralongrar kati pa temang nung alenokba bomb pokdakja, Afghanistan yimtiba, Kabul nung lendong tesashi ka tanü, Bodbar nü atalokdaktsüogo.
Kiralongrasangi motorbike ka nung mener arua, Afghan national security ketdangsertem aniba gari anasa bomb-ji pokdaktsüba osang jangjaogo.
Tan lendong nung nisung 4 poksetba aser nisung 10 shi yiruba osang police-ia metetdakja liasü.
Tanep lendongji par teloki atalokdaktsü ta shia, Islamic State (IS) teloki tanü lendong atalokdaktsüba atema tenüng agia metetdaktsüogo.
“Peisasa pokseta süa, taküm tenla agütsüsang, Talha al-Khorsani-i Afghan sorkar’er itangiter ketdangsertem aniba gari ka anasa bomb pokdakja, lendong atalokdaktsüogo,” ta IS teloki social media ajanga osang sangoktsü.
Tan lendong atalokba ajanga Kabul nung tanaben tensa mejungi akümtsü tenzükba kuli angur lir.
US-i aniba alima teloktep mitkar timbakati Afghanistan toktsüba sülen IS telok dang masü saka Taliban telokia tan amala lendong atalodakja, Afghanistan nung tensa mejungi kümdaktsütsü tenzükba osang bushiteta lir.