Germany Foreign Minister, Steinmeier-i Turkey semdanger

Istanbul, November 16 (Agencies): Germany Foreign Minister, Frank-Walter Steinmeier-i Turkey semdanga, Turkey Foreign Minister, Mevlut Cavusoglu den senden ka yashi, Mongolbar nü amenba osang jangjaogo.
Turkey aser European Union (EU) na tsüngda tesendaktep mejungi akümtsü tenzükba mapang ka nung Steinmeier-i tan Ankara semdanger lir.
Turkey mitkar telok kati tamakok ngua, tashiyim agi Turkey linük indang yimsüsütsü tashi taküm, 2016 küm July ita agitsü merangba ken o nung ajemdaker, Turkey Tir, Recep Tayyip Erdogan-i aniba Turkey sorkari sorkar anemer ta temulung melemi bilemba nisungtem anemba maparen aitsür rong nung Germany ya tongti linük ka lir.
“Cavusoglu den onük benoka jembidang aiben tangatetba balala küma, mangatettep adoka senden menogo. Ajisüaka, Turkey-i benokba EU nung züngsemtsü maparen nung ozü Germany linüki par linük pusema nungitsü nangzüker,” ta Steinmeier-i metetdaktsü.
Turkey sorkari tashiyim amshia, sorkar anemer ta temulung malemer anema kanga sashia inyakba nung ajemdaker par linük nem EU nung züngsemtsü temeten magütsütsü atema EU nung züngsema alir linük karibo onük benoktsü tenzüka lir.
Mitkar teloki tamakok ngua, linük tashi tashiyim agi agitsü merangba mapang nungi tenzüka, tanü tashi nung Turkey sorkari nisung 120,000 dak tema mapa nungi anentsüba aser osangbener 100 dak tema densema, nisung 33,000 shi tepuokdak puoka yua merenshiba osang bushiteta lir.
“Turkey sorkari sorkar anemer ta temulung malemba nisungtem anema kanga sashia inyakba atema ozü linüki tebilemtsü akar,” ta shia, yamaji bilembaji par Germany-i Turkey’er kibok ken o nung teka amoktsü meranger ta mebilemtsü olen ka Steinmeier-i metetdaktsü.
EU nung züngsemba linük kari par Turkey linük mezüngmeshiba atema mepela olen ka Cavusoglu-ia metetdakja liasü.
EU nung züngsemba linüktemi par linük aitsütsü tenzükba sülen par Turkey linüki EU nung züngsemtsü telemtetba tatem küma agitsü atema nübur rong nung vote bendentsü sentong ayonga agitsü bilemba olen ka Erdogan-ia tawa metetdakja lir.
Ano, Turkey sorkar anemer tongti telok, PKK telok pusema yariba ken o nung ajemdaker, Cavusoglu-i Germany linük aitsütsü olen ka metetdaktsü.
Ano külen, Steinmeier o Cavusoglu nati par senden amenba mapang nung Turkey Ato Kilonser, Binali Yildirim-ia EU tesepti, Brussels nung amenba EU parliament senden nung par Turkey linük EU nung züngsemdaktsütsü mesüra kasaji magizüktsü telemteta tatem küma agitsü asoshi takhangba benokba osang angazükogo.