PM-i account shia Rs 5 lakh inoktsütsü asü?: Gadgil

Mumbai, November 16 (Agencies): Ato kilonser, Narendra Modi aija Bodhbarnü Congress lenir, Anant Gadgil-i, “Account shia sen lakh 15 nangzüka aliba nungi senso shia indang account nung sen lakh pongungu inoktsütsü asü? kechiyong sen melenba ajanga sorkari black money jenti ngur asütsü,” ta ashi.
AICC otongdar Gadgil-i, “Sen aika (Rs 500/1000) indang note melenba ajanga black money aika bendener asütsü. Yamaji süra Ato kilonseri senso shia dang sen lakh 15 nangzüka aliba nungi nisung shia bank accounts nung tajemba agi lakh pongungu bosa inoktsütsü asü?” ta asüngdang.
2014 Lok Sabha election atema nüboyimba mapang Narendra Modi-i black money indang kanga jembia liasü aser pai black money ji bener arua senso shia bank account nung lakh 15 inoktsütsü, ta nangzüka liasü.
Iba dak sentakba nung Gadgil-i, sen tasen menüngba nung crore 15,000 intoker asü? Ibaji Modi-i ashitsüla, ta ashi.
Paisa, sen note 500 aser 100 anentsüba sülen hopta ka shi linük nung sen transaction maliasü, aser ibaji ajanga linük nung sen lakh crore 25 takoksa ngur asü?, ibaji Ato kilonseri jangjatsütsüla, ta ashi.
“Tang timtem tensa adoka aliba ya jilia sentong junga meyangluba ajanga lir. Iba telemtetba agiba sülen anogo 5-6 shi bank shibangtsü sentong liasü, ajisüaka nüburtemi ola adokba ajanga ibaji agien,” ta Congress lenirisa ashi.
“BJP lenirtemi ashiba agi, black money ji nütsüng shilem 5 ket nung lir, anungji kechiba tanüngba nisung shilem 95 ji taoba hopta ka tashi timtemdaktsür,” ta paisa aitsü.