“Art Ensemble” kaogo; “A Thousand Art Project” tenzükogo

Kohima, November 17 (TYO) : Tanü Brihostibarnü Directorate of Art & Culture (Art Wing)-i “Explore” omen nung ajemdaker “Art Ensemble” sentong Directorate office, Bayavü colony nung kanga takok ngua ayonga kaogo. Department-i state nung tang atuyaa aliba sempet aketertem nisung 1000 tashi tongjema inyaktettsü nükjidong nung tenzükba “A Thousand Art Project,” inyakyim Music Task Force (MTF) nung Project Director, Gugs Chishi-i kasa sentong nung lapoktsüogo.
Sentong nung arua adener sempet aketertem den o jembidang Chishi-i, “State nung art ajungkettsü atema department-i iba ama sentong tajung shisateta akaba atema tenüngsang agütsür aser “A Thousand Art Project” tenzükba atema kanga pelar. Iba inyakyim tenzükba ajanga sempet aketertem tali tejakleni otettsü imlar. Nenok ya temelenshi atema tanir ka ama asütsü,” ta ashidang, nenoki nüburtemtem sendaktepa kümdaktsütettsü, ta ashisem.
Music aser art naprong agi asen mulung nung bilemba temai adoka lemsateptetter.
Art & Culture Department nung Art Executive, Vilalhou Noudi-i, “”Art Ensemble” sentong ya sempet tajung keta alirtem longjemdaktsütsü aser art den lanur aser kaketshir sempet tajung keta alirtem ajungkettsü atema lenmang tajungba bushitsü atema ayongba lir,” ta ashi.
Asen lokti nung temelenshi bener arutsü atema art ya hadir ka ama amshitsü nükjidong lir, ta pai ashi.
“A Thousand Art Project” (Initiate, Interact & Impact) atema jembiba mapang N. Mhao Odyuo-i, iba project ya sentong balala nungi art 1000 bendenba inyakyim ka asütsü aser ibaji ajanga artist tem den sendaktepa akümtsü aser tang atuyaa aliba lanur artist 1000 yaritettsü, ta ashi.
Pai, iba project ya kija aser nija ajangzüktsü atema masü saka nükjidong ka kübok ajak senteper inyaktsü maparen ka lir, ta shisem. Iba project ya ajak asoshi lapoka lir.
Art ajanga tajangzük angur, shisa luyim nung temelenshi angur, rongsenkettsüng tali tashi itdaktsür, tesem nung aliba shishilembartem atema tajangzük bentsür arur, raliwalirtem atsüa arur, shishilemba nung ajangzüker, puraputi aser temulung nung aliba temai adoker, lokti nung temelenshi bener arutsür aser temang anema aliyim nunga yariba reprangteta “A thousand art project” ya lapoker, ta paisa rasaa ashi.
Tila tanur aser alima tsüngda art ajanga tajangzük agütsüba ashidang, pai, art ajanga bushitsü aser tali angazüktsü meima kümdaktsür, tesüiba mapangtem nung malibatem shisatettsü jangrar, pei aibelenba nungi angazüker, takoktsü mapa ka atema atsü ayong masür, tekolok rangben renlokdaktsür, tanurtem tarutsü atema renemshitsür, aser lipoküm den tesendaktep tashi itshidaktsür, ta ashi.
Iba sentong nung Divine Connection aser Ayim Longchar nungeri ken aten, Atoulie Zatsu-i shidi agi kechisarena yanglua sayu (origami), noksa yangluba sayu, Naga art gallery sayu, Android phone photography aser kaketshirtem noksa yangluba tetoktepbatem lapok.