Pakistan aser Turkey nati amaliteptsü nangzükteper

Islamabad, November 17 (Agencies): Pakistan aser Turkey nati shishilembatsü, energy, kiojen renemtsü, security, kaketshisatsü bushitsü, sobaliba aser science & technology densema, par linük anati sabang balala nung amaliteptsü tenzüngzüktep tanü, Brehostibar nü agiogo.
Pakistan Ato Kilonser, Nawaz Sharif aser Turkey Tir, Recep Tayyip Erdogan nati Islamabad nung senden amendang tongti tezüngzüktepji agia liasü.
“Otsüren, sobaliba aser tamangba yimsü nung ajemdaker, ozü Pakistan aser Turkey na tsüngda tesendaktep tajung lir aser ozü linük anati regional tajangzük bener arutsütsü densema, sabang balala nung amalitepa inyakteptsü nangzüktepogo,” ta Erdogan den aroki oangbener den ajurutepdang Sharif-i metetdaktsü.
Erdogan-i tan anogo 2 agia, Pakistan semdangba ajanga par linük ana tsüngda tesendaktep kanga junga aliba kuli angur.
Par linük ana tsüngda sentaktepbaren taoba mapang nungi tajungba kümdaktsütsü nükjidong nung Turkey aser Pakistan na tsüngda nüburtem aniba tayimtsü taoba mapang nungi timba senzüdaktsütsü asoshi lenir anati tanü bangjema liasü.
Turkey aser Pakistan na densemba region nung yimji yimjung tia aser tensa junga lidaktsütsü atema taoba mapang den tesashiba aser bendanga agüja inyakteptsü asoshi tenati lemtetba osanga angazükogo.
“Tan agiba tezüngzüktep mapa küma inyaktsü atema ozü Pakistan-ia bendanga agüja nungdakba maparen ajunga takok ngua inyaktsü nangzükshir,” ta Sharif-i sangoktsü.
“Turkey linük ya ozü Pakistan-i temulung alemba tembar linük ka lir,” ta shia, par linüki Turkey den aroki lungjemer kiralongrar anema takok ngua raratsütsü imlaba olen ka Sharif-isa metetdaktsü.
Internet ajanga ozüng alema inyaker anema takok ngua raratsü aser ozüng alema inyakertem nokdangtsü maparen nung par Turkey linüki Pakistan nem nungdakba teyari agütsütsü tenangzükba olen ka Erdogan-ia metetdakja liasü.