Trump-i Pak ya kiralongrar linük ta sangdongtsü: Shalabh Kumar

New Delhi, November 17 (Agencies): Pakistan ya kiralongrar linük ka lir, ta sangdongtsü atema benoka aliba Congress Bill ji US Tir menden atema shima alisang, Donald Trump-i agizüktsü, ta Donald Trump advisory council nung züngsem aser nüngtugu shishilembar India nung asor, Shalabh Kumar-i metetdaktsü.
“Tir Trump aser Ato kilonser Narendra Modi na tesentaktep ajungtsü. Trump Tir kübok India-US partnership jenjang tasen ka angutsü,” ta paisa ashi.
“Tir tasenbai tongtibang mera ka agitsüji- House nung Pakistan ya kiralongrar linük ka ta sangdongtsü atema US Congress bill benoka alibaji pa (Trump) ket kodang tongdir pai agizüktsü imlar,” ta Kumar-i USA nungi phone ajanga India nunger osangbener ka dang metetdaktsü.
Taküm Pakistan nungi kiralongrartemi Uri nung army amakba sülen tang mezüngsüa September ita nung US Congress züngsem anati Pakistan ya kiralongrar linük ta sangdongtsü atema bill ka benoka liasü.
Congress züngsem aser House Subcommittee on Terrorism mendenbuba, Ted Poe aser Congress züngsem, Dana Rohrabacher nati Mongolbarnü House nung ‘Pakistan State Sponsor of Terrorism Designation Act’ benokogo.
“Black money anema raratsü atema Modi-i mera takang agia sen tamshidak anentsü aser ghonda ishika tsüngda Donald Trump 45buba USA Tir akum, aser iba ya ajanga linük ana tesentaktep tajungba akumtsü atema tajung anogotem temaitsü sayur,” ta Kumar-isa ashi.
1960s mapang nungi USA-i oa alir Kumar-isa, India-US tesentaktep maneni junga alitsü atema India nung bangdak ketdangsertemi Trump’er telok den tongtepratepdar, ta metetdaktsü.
Kumar ya BJP aser RSS naprong den tesentaktep junga lir aser Trump indang Indian American Advisory Council züngsem aser Trump atema Asian American Advisory Council züngsem lir. Kumar ya electronics yangluba company (AVG Advanced Technologies) kibur lir aser Republican Hindu Coalition tentetsang lir. Pai Trump election nüboyim atema US sen 898,000 (crore 6) tenla agüja liasü.