Dimapur nung Aedes merla anema mapa inyaker

Dimapur, November 19 (TYO) : Dimapur nung Dengue tashidak adokdaktsüba Aedes merla kanga bulua lir aser iba atema Honibarnü DMC office nung Dimapur Municipal Council (DMC), Medical department aser village/colony council züngsemtem külem senden ka amen.
Iba mapang District Programme Officer, NVBDCP, Dimapur, Dr. Moa-i ashiba agi, Dimapur nung Aedes merla kanga aliba tesemtemji Diphupar A area, 4th mile aser Burma camp nung lir aser ano Dimapur urban areas kübok aliba tesemtem nunga osangtem lir.
Paisa, village/colony council züngsemtem aser public dang hopta nung khenbosa lokti nübodoka mapa inyaktsü aser iba mapang tzü atsüngdendak merüktettsü ayongzük.
Iba mapa ajanga dengue aser tanga tashidaktem nungi jenbua alitsü. Department-i technical malathion indang fogging tenzükogo aser tan ita tatemlen tashi nung Dimapur urban area tem ajak ayimjemtsü merangtsü, ta Dr. Moa-isa metetdaktsü.
Pei pei temeket nung fogging asüba mapang public-i department staff den yaruteptsü mepishir aser Aedes merla aliba tesemtem nung larvivorous fish entsütem enoktsüogo, ta paisa shisem.
Senden nung DMC CEO, Atokhe Aye-ia colony/village council züngsemtem dang pei pei telongtet nung dengue indang osang tejangja sangdongtsü atema ayongzük.