ASA & Angami lenirtemi teloktep senden amen

Kohima, November 19 (TYO): Angami Sports Association (ASA) aser Angami lenirtemi 1st Class Contractor, Vilelie Khamo’er kidang, Kohima nung teloktep senden ka tanü, Honibar nü menogo.
Tanü senden nung taruba 2017 küm February ita agitsü renemba ASA golden jubilee benjungmong den sentaktepa, Nagaland sorkar den amalitepa, taruba December ita 3 nü Hornbill Festival sentong nung ASA jubilee lung atsütsü sentong agitsü den sentakba onük benoka jembi.
Jubilee lungji Kohima kübok Old Minister Hill nung tentetba Kohima Municipal Council (KMC) Parking lot nungi tenzüka, Kohima Local Ground tashi atsütsü renema liasü.
Anepdang 11:00 ako nungi tenzüka agitsü renemba sentong nung Angami GBs’ Association nung Advisor, Chatuo Paphino-i Tsüngrem temoatsü meshia sarasademtsü.
Kasa sentong nung Nagaland Chief Minister, T. R. Zeliang tongti tesemdanger aser Alan Gemmel, OBE, Minister Cultural Affairs, British Council, India tetushi tesemdanger alitsü.
Assam Chief Minister Sarbananda Sonowal-ia iba sentong nung tepela tejaoker ka ama shilem agitsü renema lir.
Iba sentong den sentaktepa sobaliba sentong agiba den chiyongtepba mapanga alitsü.
Nagaland Environment, Forest & Climate Change Minister, Dr. Neikiesalie (Nicky) Kire; Social Welfare & Parliamentary Affairs Minister, Kiyanilie Peseyie; APO President, Vilhousalie Seleyie; AMK president aser lokti lenir balalai tanü sentong nung o tatsütsü jembia liasü.
Ano külen, iba sentong nung Naga kin Hoho ajunga aser Angami nunger den sosema alir anükapang ajungai shilem agitsü atema ASA-i jaokogo.