Kanpur lendongji Rail fracture ajanga südi: MoS Railways

November 20, 2016 nikongdang Uttar Pradesh, Kanpur nung train lendong ataloka nisung 120 dak tema asüba sülen iba lendong nung kümzükertemi pei khu bushiba noksa nung angur.

Kanpur, November 20 (Agencies): Deobarnü Uttar Pradesh, Kanpur nung train lendong ataloka nisung 120 dak tema asüba lendong ya rail fracture ajanga asütsüa akok, ta Minister of State for Railways, Manoj Sinha-i metetdaktsü.
Lendong atalokba tesem anasa osangbenertem den jembidang Sinha-i, “Temaba jenjang nung bushisüngdangtsü atema tuyuogo aser onoki temerenshi tulu agütsütsü. Lendong atalokba kuliji engineers aser mongintemi bushisüngdangtsü, ajisüaka iba lendong ya rail fracture ajanga atalok südi ta bilemer,” ta metetdaktsü.
Iba lendong atalokba sülen Ato kilonser, Narendra Modi densema tongtibang nisung aikati asüko osang lemsatepogo.
Modi-i asür shia kinüngertem nem sen lakh 2 aser iba lendong nung mejungi yirur shia nem sen 50,000 agütsütsü, ta sangdongogo.
Railway ketdangsertemi ashiba agi, tanü nikongdang 3:00 ako meta Kanpur nungi kilometer 60 shi pilar aliba Pukhrayan station anasa Indore-Patna Express train takdang 14 tetsüng longpetba ajanga iba lendong atalok.