Acharya-i Mkg district ketdangsertem ayongzük

Dimapur, November 20 (TYO) : Nagaland Angh, P.B Acharya-i anogo ananü Mokokchung semdangdang Mkg ADC indang Conference Hall nung District Administration, Security Agencies aser Heads of Departments ajak den ajurutepa senden ka amen.
Iba mapang Angh-i district ketdangsertem dang parnok linük den liromedema jajar asü marakzüi nokdaka dang lir ta asüngdang.
Department ajak nung meyipa reprangshitsü nüngdak aser sorkar ketdangsertemji nübor tenzükertem lir, anungji nenoki nübortem atema sentong atongtsüla aser parnok asoshi kechi inyaktsüla ta bilema mapa inyaktsüla, ta P.B Acharya-i ketdangsertem ayongzük.
Ketdangser shiaji zünga metetertem lir anungji lokti atema tebilemtsü khuret abentsüla. Ketdangser kati mezüngbuba nung meimchir ka asütsüla, tanabuba nung linük meimer ka aser tatem nungang ketdangser ka asütsüla, ta paisa ashi.
Nisung shingaia nenok dang kecha meshitettsü ta ketdangsertemi mebilemtsüla. Loktiyimten linük ka nung ‘nisung ajakji chuba aser nisung shinga chuba masü’ ta Angh-isa shisem.
Nagaland kübok pai semdangba tesemtem ajak nung nübortemi gari lenmang majungba, mozüki majungba aser school majungba osangtem ashir, saka bangdak department tem dang asüngdangra, ‘onoki tajunga inyaktettsü’ ta dang langzür, ta Acharya-isa metetdaktsü.
Nagaland jenjang ajungkettsüla aser ibaji atema sorkar dak alia monitoring agency ka alitsü nüngdak. Iba agency jagi department temi inyakba maparen reprangshimtsüla aser aji asü nungdang mapa ajak shitak inyaktettsü. Nisung ajak tanela ka ka lir aser asenoki asen tamangba sülen chichia amangtsüla, ta paisa ayongzük.
Iba senden nung Mokokchung district nung Security Agency temi Angh den tensa indang osang lemsatep.