Sen tamshidak anentsüba ajanga Moreh mejungi kongshiogo

Imphal, November 20 (TYO): Centre sorkari sen tamshidak anentsüba ajanga Manipur, Moreh nung India-Myanmar arrtsülen shishilembaba nung kanga mejungi konghsiogo; tang Moreh anasa aliba Namphalong aser Tamu nung Myanmar nunger shishilembartemi sen 1,000 aser 500 notes tejenba magir, ase ibaji ajanga arrtsülen alir kanga mejungi kongshiogo.
Iba den külemi India nunger tilateri shishilembartema sen agi anüngba ajanga Myanmar markets nungi osettsüset aser aonsotsü bener maruteter. Iba denji kasa kidanger linük nungia shishilembartemi India nungi osettsüset mebenteter, kechiyong Moreh nung alirtem banks aser ATMs nung tarensen nung nokdakdang mapang timbaka intoker.
Moreh, ya Centre sorkar indang ‘Act East’ policy atema tongtibang tesem ka lir, aser iba tesem nung anogoshia sen crore 5 shi jenjang shishilembar, ajisüaka Honibarnübo Moreh yimti ya kanga azüngmeyaka lir.
Yangji alir kati osangbenertem dang, “Shishitsü atema nisung kar dang Moreh, Namphalong aser Tamu-i arur,” ta ashi.
Ano külen Imphal nung amenoka aliba osangkakettem kiburtemi Hokolbar nungi tenzüka osangkakettem madoker. Manipur yimtiba, Imphal nung maneni sen agizüker, inoktsür aser melentepdar ajisüaka kiyimba benjung atema tebilemtsü tulu ajurua lir.
United Naga Council (UNC)-i mapang telatet kecha makai Naga nunger aliba tesemtem nung National Highways nung rongsenkettsüng lenmang mokdangaka Honibarnü Imphal nung totzü ayokba tesemtem nung nisung jenti adenshia liasü.