Sindhu-i 1buba Super Series bena otsü tasen yangluogo; Jorgensen-i World Champion koka takok marok aben

Fuzhou, November 20 (Agencies) : Deobarnü sen dollar 700,000 alang China Open badminton asayamung final asaya nung Olympic nung silver medal abenla India tsür badminton asayar PV Sindhu-i China tsür Sun Yu madak takok ngua la atema tan mezüngbuba Super Series Premier title nguteta otsü tasen yangluogo.
Rio Olympics mapang India tsür rongnung mezüng silver medal angula Sindhu aser Sun na gondha ka ser minute 9 asayaba nung Sindhu-i 21-11, 17-21, 21-11 agi takok ngua iba akhümket marok angu.
“Iba ni asoshi mezüng super series title lir aser ni kanga pelar, ni kü tepela o kija agi merasateter,” ta Sindhu-i ashi.
Sindhu-i mezüngbuba Super Series final asaya nung final atongbaji yaküm Denmark Open asayamung nung liasü, ajisüaka lai iba asaya nung 2012 küm Olympic champion China tsür, Li Xuerei madak tamakok ngua liasü.
Ano Deobarnü Fuzhou nungsa tebur final asayaba nung Denmark nunger Jan O Jorgensen-i world aser Olympic champion Chen Long madak takok anguba ajanga alima nüburtem aoksadaktsü.
Chen tena tsüngda 10 ben asaya aruba nung Jorgensen-i 2014 küm Indonesian Open nung khen akokba sülen tan tanaben Chen akoker. Denmark nungbai 22-20, 21-13 agi Chen madak takok ngua iba takok marok ngutet.
Mezüng game bo kanga pettepa asaya ajisüaka tanabuba game nung Jorgensen-i Chen nem khen tanga pa indang point memenepdaktsüi asayaba ajanga minute 46 tsüngda nung iba takok tulu angu.
Taküm May ita Kunshan, China nung Thomas Cup international asayamung mapang Denmark atema tarep asaya nung takok bener arutsüba sülen tan kija asaya nung pai iba takok angurba lir.