T.R. Zeliang-i Friendship Motor Rally tenzüktsüogo

Nagaland Chief Minister, T.R. Zeliang-i Kohima kübok Khouciezhie Local Ground nung India, Myanmar aser Thailand (IMT) Friendship Motor Rally sentong tenzüktsüba noksa nung angur. (Kohima, November 22)

Kohima, November 22 (TYO): Nagaland Chief Minister, T.R. Zeliang-i Kohima kübok Khouciezhie Local Ground nung Friendship Motor Rally sentong tanü, Mongolbar nü tenzüktsüogo.
Delhi yimtiba kübok India Gate nungi tenzüka agiba Friendship Motor Rally sentong ya Thailand yimtiba, Bangkok nung taruba December ita 2 nü tembangtsü.
South East Asian region ajunga lenmang ajanga sendaktepdaktsütsü aser nüburtem nem tajangzük bener arutsütsüsa India, Myanmar aser Thailand (IMT) linük rongnung Motor Vehicle Agreement tezüngzüktep takok ngua agidaktsütsü nükjidong nung ayongba rally sentong nung shilem agirtemi IMT Trilateral Highway nung kilometer 5,722 tashi jajatsü tenzüka lir.
Nagaland nungi telok 1 densema, tan sentong nung India nung yangluba gari 20 shi anishia, gari anishir aser teyariteper ajak agi nisung 80 shi shilem agiba osang angazükogo.
Bangkok tonga aoba jakdang, Manipur yimtiba, Imphal aser Myanmar kübok Began aser Yangoon nunger densema, yimti balala nung tanü amala rally tenzükshitsütsü sentongtem agitsü sentong lir.
India-i kidangsüa aliba linüktem den tanaben sentaktepshitsü, linük 3 aser nübur rong nung sobaliba aser rongsenren tesendaktep tajungba kümdaktsütsü aser sentaktepba ajanga arok tajangzük bener arutsütsü nükjidong nung tan rally sentong ya ayonga agiba osang jangjaogo.
Ano külen, tan rally sentong nung shilem agirtemi tan Hombar nü Kohima tonga aodang Nagaland Parliamentary Secretary, Youth Resources & Sports, Khriehu Liezietsu aser department ketdangser ajungai parnok pela agizüka liasü.