Tamangba yimsü dak jaloka reju tenüng majatsüla : Acharya

Kohima, November 23 (TYO) : Nagaland Assembly nung yashi St Joseph University (Nagaland) Bill, 2016 yanglushiba agizük.
Taküm mei mapang Assembly session iba Bill ya St Joseph Catholic University (Nagaland) Bill, 2016 ta benok aser State Angh, P.B Acharya dangi aben.
Ajisüaka, Angh Acharya-i Bill reprangdangba sülen nüngja melenshi junger ta House dang temelenshi asütsü atema tebilemba lemsatep.
Acharya-i tebilemba shidangba agizüka melenshiba sülen Higher Education Parliamentary Secretary, Deo Nukhu-i St Joseph Catholic University (Nagaland) Bill, 2016 nungi St Joseph University (Nagaland) Bill, 2016 ta melenshiba benok aser ibaji voice vote ajanga agizüka ayu.
Mongulbarnü assembly nung Speaker, Chotisuh Sazo-i Angh P.B Acharya-i züluba shidi zünga metetdaktsü.
“University kaji shisaliok reju ka lir aser iba nüngjaji tamangba yimsü dak jaloka majatsüla.
“Iba inyakyim ajanga tanga rejutemia pei tamangba yimsü dak jaloka tenüng ajatsü. Anungji, St Joseph Catholic University (Nagaland) Bill, 2016 jagi St Joseph University (Nagaland) Bill, 2016 ta melen nung ajungtsü” ta Acharya-i züluba shidi nung shia lir.
Nagaland state nunga Lokayukta tenzüktsü atema civil society telok aikati mepishia aruaka, tanü Assembly-i maneni The Nagaland Lokayukta Bill, 2015 atema shimba Assembly Select Committee indang mapang apuloktsü.
Assembly-i Committee nem ita trok tsüngda report agütsütsü tetuyuba agütsü. Tan agi tanabenbuba Assembly-i Committee nem mapang apuloktsüogo.