2016 Miss Mokokchung Nov 26 aonung shimtsü

Miss Mokokchung 2016 fanning out sentong agir külen tetokteper tobur tajung kongrulartem den tayonger communiqué pur külemi The Woods Yimchalu nung tangokba noksa nung angur.

Mkg, November 23 (TYO) : Taküm 2016 “Miss Mokokchung” shimba sentong November 26 aonung 6:00 ako nungi tenzüka Mokokchung Town Hall nung alitsü, ta tayonger Communique mendenbula Wt. Akala Pongeneri Bodbarnü yangi “The Woods” Yimchalu nung osangbener senden ka nung jembidang metetdaktsü.
Taküm Miss Mokokchung shiba adokdir laji District Disaster Management Authority (DDMA) indang “brand ambassador” küm ka atema asütsü, ta laisa ashi.
Takoker nem senpet sen den tanga senpet densema agütsütsü, ta laisa ashi. Taküm Miss Mokokchung nung tetokteper rongnung Screen Out agir külen tesüsabuba round atema tobur tajung kongru parnok ti (8) shimteta lir, ta laisa shisem.
Miss Mokokchung dak sentakba nung tanü “fanning out” sentong The Woods (Yimchalu) nung takok ngua agiogo aser sub-titles senpet-temji; Miss Photogenic, Miss Congeniality, Best Complexion, beautiful hair aser perfect 10 nungertem shimtsü ta angazüker. Item senpettemji; Miss Mokokchung shimba aonungji agütsütsü.
Tetoktepertemji; shisalen sayur balala den ano Mokokchung nung aliba Pinnacle Skill, Aerobic fitness,, fitness studio ama nung pei temang aser nübusen renlokba dak sentakba onük balala nung tesayuba agüja liasü aser Mokokchung Disaster Management Authority ajanga alima tzü-mopung lendong tapu balala atalokba mapang langzütsü asoshi shisatokden sentong balaka katsü, ta Event Manager aser Designer Wt. Akala Pongenisa shi.
Taküm Miss Mokokchung nung takoker nem senpet sen (cash award) REM Group-i renemtsütsü, ta laisa ashi.
Taküm iba sentong Adang Jamiri choreograph asütsü, Akala Pongener designer asütsü, official noksa tangoker Aren Changkiri aser Make-up Artist Naromen Jamir aser Atu Lkr na asütsü, ta tayongertemisa ashi.
Parliamentary secretary for Agriculture, Dr. Benjongliba Aier iba sentong nung tongti tesemdanger aser Nagaland BJP Vice President Imsü Yaden tetushi tesemdanger asütsü jaoka lir.
Miss Mokokchung 2016 sentong ya “Elegance, a beauty that never fades” omen nung ajemdaker akatsü. Iba sentong ya Mokokchung District Art and Culture Council (MDACC) akhüm nung Communique teloki ayongerba lir.
Mokokchung nung aliba Communique ya fashion dak amendaker tentetba telok ka lir. Iba telok yagi lanur sempet aketertem anitena art aser fashion luyim tsütsü ajungkettsü asoshi nükjidong yur inyaker. Iba telok ya Wt. Akala Pongen lenisüba nung tentet. La ya NIFD Guwahati nungi designer graduate ka lir. Par teloki fashion designing tsütsü takok aser senpet anguba aika lir.