Canada nung India tsür osangbener ka nem tetushi agütsü

Ottawa, August 9 (Agencies): Canada nung alir India tsür yim o zülur kati media maparen kanga takok ngua inyaktetba asoshi India nung Punjab nunger Canada nung alir teloki tetushi agüja liasü.
Hokolbar nü Parvasi Media Group-i ayongba ‘Parvasi Awards’ sentong nung Toronto Sun osangkaket nung editor-in-chief, Adrienne Batra nem “Best Journalist Award” agütsü.
Parvasi Media Group ya Punjab nunger Canada nung alirtem ajanga konang nüngsang bentsür aruba metetbela-a tenüngsang agütsütsü asoshi 2005 küm tentetba lir.
“India nunger Canada nung alirtemi mapa tapu balala nung kanga takok ngua inayakteter lir, ajisüaka kü nem iba akümket senpet agütsüba asoshi kanga pelar,” ta Batra-i ashiba Toronto Sun osangkaket ajanga metetdaktsü.
Batra ya Toronto Sun nung 2011 küm nungi inyaktsü tenzük aser ibaji masüdang Canada armed force nung lieutenant ka amai inyaka liasü.
‘Parvasi Awards’ sentong nung tesüiba mapang India nungi asemteper, Milkha Singh tongti tesemdanger liasü.