Opposition party temi o toktepba nungi ajener: Arun Jaitley

New Delhi, November 24 (Agencies): Tanü Union Finance Minister, Arun Jaitley-i, sen anentsüba onük nung opposition party-i o toktepba nungi jena aotsü atema tatemtsü kuli bushir, ta aitsüba den külemi taoba Ato kilonser, Manmohan Singh-i sorkar aitsüba o meyipja, pa (Singh) kanga mepelar, kechiyong pa yimsüsüba kübok black money timtiba adok, ta aitsü.
Manmohan-i, linük GDP shilem 2 ajema akumtsü ta jembiba o magizükteti Jaitley-i, küm ishika nungbo sen anentsüba ya ajanga tajangzük alitsü, ta ashi.
“Par yimsüsüba mapang küm aika black money aser ochimashi indang parnoki bilema maliasü, aser tangbo parnoki black money anema inyakba ya aibelen ka lir ta aitsür,” ta Jaitley-i ashi.
Iba onük nung o toktepba piyong senden nung Ato kilonser alitsüla ta takhangba agüja Rajya Sabha senden aiben thinena liasü, aser ibaji aija Jaitley-i, opposition-i o tokteptsü jangraa mali saka senden melitetdaktsütsü atema dang jangrar, ta ashi.
“Sorkari mezüng anogo nungi o tokteptsü melunga lir ta onoki shiogo. O lemtepba paidoktsü atema Opposition-i tatemtsü kuli bushir, saka tanepbo onoki, Ato kilonseri o toktepba nung shilem agitsü ta sangdongba ajanga parnok aoksa,” ta Jaitley-i ashi.
“Joko tangbo parnoki o toktepba nungi jena aotsü atema tatemtsü kuli yanglur aser bushir,” ta Finance Minister-i yangi osangbenertem dang ashi.