Sen agi timtemba mapang

Nisung kar bank nungbo sen rezünga lir saka nüngdak nung amshitsü asoshia peria magizükteter, ano karbo kidang sen aika yua lir saka taputsü tsübuba agi lakh ana semka dak alaka bank nung meyutetter ta tang ya takar sensaker ajak sen agi timatemba mapang lir. Atangji, bank nungbo yua lir ser nung magizüktetter atemabo balaka shisabolutsü mali kechiyong tang mapang tatsüka ya süitemerbo agizüktettsü saka kidang sen aika yua alirtemang merizüngtet takoksa tulu ajurutsüba tia nung lir. Linük nung Narendra Modii aniba BJP (NDA) sorkar arur külen telemtetba agiba rongnung tang sen 500 aser 1000 note melenba telemtetba ya tasakba aser tajungtiba telemtetba asütsü. Atangji, timtem aser takoksa marem opposition telokibo kanga anemer. Iba jagi tang temendak tatar sendena junga mementeti anogo shi thitemathitema odagi. Tang sen 500 aser 1000 melendokba ya ajanga linük nung sen taila amshiba nokdangtettsü aser ano yimten nem alimelen shitak magütsüi miimzüka ayuba sen aser ano ochimashiba lenmang nungi bendenba sen ajak tamakitsü kümdaktsütsü. Iba jagi, talisa, election ama nung sen agi nübortem mesüzüker takartem aika maka kümdaktsütsü. Kechi mapa nung südir süaka tajung akümtsü asoshi ajaki timtem tilakabosa agitsü nüngdaker. Aji oda, raksar aliba ka yanglushitsü asoshi timtem kar magiang meyanglutettsü. Iba tangatetba nung nübortemi ano anogo ishika mapa teinyaknütsü meinyak, techinütsü machi aser taginütsü magi timtem arema atatsü nüngdaker. Tang timatemba ya sen makaba agi timatemer masü mesüra sen apua akümba (devalue) agi timatemer masü  saka nübortem timtemdaktsür ket nungi nübortem kümzüktsü mechi nung nübortem timatemba mapang ka asütsü. Asenok aikati yimten nung ochimashi inyakba anema ola adoker aser alima yanglshitsü asoshi nüngdakba indang kanga jembir. Ajisüaka, yimten aser loktiliba yanglushitsü asoshibo nübo kata magütsütetter aser timtem tilakata maginer. Asenbo kidang ajemajema ataa alitsü aser tangartem dang yimdong nung longkak aita senzüdaktsütsü, asenbo kidang dang mena alitsü saka tangartemang lokti senden nung adeni aotsüla. Asenibo yimjak nung tangar anema mejembitsü saka tanemi nüngsen dang jembitsü saka yimjak nung nüngsen agia jembirjibo tangar asütsüla. Asenbo kaonunga nükenbelem masütsü, chiyong kena matitsü, o dak alaka tenla kecha magütsütsü saka nükenbelema tangar agitsüla aser tenlatenchia tangari agütsütsüla ta asenoki bilemer. Asenok rongnung iba ama nisungji teimba aliba agi yimten aser loktiliba tamajungba akümer. Aji oda, merükabo linür saka temang nung auyi pongloka kilong aser kima muokner ta asüba amai ochimashiba anemabo jembir saka ochimashi anema raraba tongpang nungbo timtema menokdakner. Iba amaji asenoki timtem tilaka maginüdang, nüngsen maremdang aser nükenbelem mesünüdang tamajung nem tajung kokdaktsür. Iba jagi nisung kar repranga lia manger sangwa nung takar akümer aser ano karbo repranga lia tesensakba tesensakba akümer. Iba jagi nübortem aika tebok tazüng mejanger aser asüngnep indang bilemba agi amuia moutetter. Aji oda, timtembo maremer saka tamajung aser ochimashi inyakertem tsüngdangbo aremzüker ta asüba agi tamajunger aser ochimashirtem aika züindaktsüogo. Iba jagi alima majunger aser nübortem timatemer. Aji oda, tang amai ochimashiba mapatem anema yimteni anir nokdangdang, kechi teloki yimsü asür ta masü saka linük aser nübortem asoshi kechi ajangzüktsü ta asüba tsütsü bilemdanga shilem agira, iba jagi tanü asen lima mejungaka asüngbo ajungtsü. Iba tangatetba nung tang linük nung sen melendokba ajanga timtem ajuruba tia ya nübortemi aremzüka atatsüla aser ochimashiba lenmang len nung bendena ayuba sen takidak maka akümba anogoji yongayaa timtem arema  atatsüla.