Myanmar tzümetsüng ajanga nübur million ka kongshiogo

Nyaung Kon Village (Myanmar), August 09 (Agencies): Tanü tashi nung Myanmar linük tzümetsüng ajanga nübur million ka kongshiogo, aser southwestern delta nungbo ki telungi dena tzü aitba ajanga yimtaklirtemi pei ki toktsür semtu nung jenoker, ta sorkar osang ajanga metetdaktsü.
Tzümetsüng ajanga linük nung asürtem 100 ajungtsü ana nung lir.
Tesem kar nungbo tzü agi metsüngbanger kilem dang angur. Sorkari mepishiba sülen bendang linüktemi yaritsü tenzükogo, saka tang tashi nungbo teyariji rong ajanga noodles, jang aser tzü tajemtsü bener arütsüba dang lir.
Tzüngluruwa mongpu June ita tatemlen tenzüka liasü aser tawa Cyclone Komen ajanga-a Myanmar nung tzünglu sashia aruba ajanga anentsüh lendong aika atalokogo.
Tanü linük nung tzümetsüng ajanga asürtem 99 jungogo aser nisung 900,000 dak tema kongshiogo. Item rongnung shilem asem nungi shilem ka nüburtembo Irrawaddy Delta nungi lir, ta Relief and Resettlement, Ministry of Social Welfare Director, Phyu Lei Lei Tun-i ashi.
Tan hopta United Nations-i Myanmar sorkar nem US sen million 9 agütsütsü nangzükogo, saka tang tashi nungbo teyariji sensotem aser NGO tem nungi dang arudar.