Rap kentener Sean Price süogo

August 09, 2015: New York nungi US Rap kentener, Sean Price arishi küm 43 nung pa aliba kidang sür lia angu.
Heltah Skeltah rap kentener telok nung züngsem, Sean Price ya Boot Camp Clik aser Random Axe nung kanga nüngtugu süa shilem agiba nüburtemi tang tashi kanga züngshir. Pa ya Honibar aonung asü südi, ta bilemer saka pa koma sür asü’ar ibaji ano mejangjateti lir.
“Duck Down Music-i Price asüba osang kanga temulung raksaa metetdaktsür…. pa Brooklyn nung August 8 nü pa aliba takdang nung asü. Price ya koma sür asü’ar tang tashi nung ano mejangjateti lir, ajisüaka pa ya mejangba mesak südi ta bilemer. Pai kinüngtsü den tanur asem toktsür iba lima nungi pilaogo,” ta Price den külem inyakertemi sangdong ka ajanga metetdaktsü.
Rap kentener MACklemore-i iba osang angashia kanga aoksa aser twitter nung Price nem akhümtsübu agüja, “RIP Sean Price…. kanga temulung raksar. Pai ni kanga ajungmesoa liasü. Par kibong, medemer aser Duck Down atema sarasademtsür,” ta lemsatepogo.
America nunger rap kentener aser actor, Ice-T ta ajasang Tracy Lauren Marrow-i, “‘Helta Skelta’ nungi Sean Price arishi küm 43 nung süogo…. yabo kanga kara asür..RIP,” ta akhümtsübu agüja Twitter ajanga lemsatepogo.
Sean Price ya Jahmal Bush den Heltah Skeltah tentetba sülen kanga nüngtugu aküm. Boot Camp Clik nung maden tsüngda tenati mezüng kensep ‘Nocturnal’ 1996 küm saya liasü.
Price ya August 21 nü kensep tasen ka sayatsü renemshiba mapang ka nung iba lima nungi pilar, ta Rolling Stone-i shia liasü.