Sensakertem nem temeten agütsütsü atema inyakdar: PM Modi

Bhatinda (Punjab), November 25 (Agencies): Tanü Ato kilonser, Narendra Modi-i, sen 500 aser 1,000 notes anentsütsü telemtetba agiba ajanga timtem ajuruaka linük nüburtemi nungitba atema pelar, ta metetdaktsü.
Tanü Punjab, Bhatinda yimti nung All India Institute of Medical Sciences (AIIMS) ka amenoktsü atema lung azüngtsüba sentong nung jembidang Modi-i, “Black money aser ochimashi ajanga middle class dang nungi jenti auyaogo aser sensakertemi temeten mangur. Middle class pur mashiokdaktsütsü aser sensakertem pei temeten angutsü atema ni akokba tashi ajak inyakdar,” ta metetdaktsü.
Paisa, “Ochimashi aser black money ji shipu ama lir, koba ajanga linük yirutsür. Timtem ajuruaka ni nungitba atema nüburtem dang pelaba o kija agi mabensateter,” ta ashi.
Ato kilonserisa nüburtem dang shishilembatsü atema digital payment methods amshitsü ajungshia, “Nü phone ji bank agi melenang, ibaji nü senpong kümdakjang. Nü ket nung senpak ka danga meliaka tanü putu technology nung item lenmang ajanga nai dokantem nung shishilembatettsü,” ta ashi.
AIIMS tasen amenoktsü dak sentakba nung Modi-i, “Yangi AIIMS amenokba ajanga local tesemtem nung alirtem ajangzüktsü. Tan sorkar yagi lung azünga yutsüba ya dang masü saka onoki iba project tembanga inyaktsütsü,” ta ashi.
Yipten 750 indang AIIMS ya ali acre 200 nung sen crore 925 indoka yanglutsü.