Dec 1-10 tashi Hornbill Festival amungtsü; C. Apok-i Naga nunger ayongzüker

Kohima, November 25 (TYO): December 1 nungi 10 tashi Naga Heritage Village, Kisama nung Hornbill Festival amungtsü atema Tourism Department den sendaktepa aliba department tem aser tribal teloktemi kanga dang mazüngi mapa inyakdar.
State Tourism aser Art & Culture Department temi Hornbill Festival ayongzüka amunger aser iba benjung ya Nagaland indang sobaliba takar kümzüka ayutsü atema sobaliba dak sendakba shilem balala agir.
Kisama nung sobaliba dak sendakba sentong agiba dak alia, state yimtiba Kohima nunga anogo 10 nü Night Carnival ayongzüka agir aser ano Indira Stadium nunga International Hornbill Music Festival agir.
Hokolbarnü Tourism Parliamentary Secretary, C Apok Jamir-i osangbener senden ka nung ashiba agi, Hornbill Festival ya Naga nunger kin ajak longjemer benjungtepba lir, kechiyong iba dang “festival of festivals” ta ajar, ta metetdaktsü.
Hornbill Festival ajanga state sorkar nem sen kwi tajangzük angur ta osangbeneri asüngdangdang, “local entrepreneurs temi domestic aser foreign tourists nungi tajangzük angutsü atema dang sorkari iba sabang lapoktsür” ta C Apok-i langzü.
Hornbill Festival tasemnübuba nung Assam Chief Minister, Sarbananda Sonowal tetushi süa jaoker ama shilem agitsü aser iba anogomung nung Angami Naga 6000 shi kati Traditional Naga Stone pulling shilem agitsü, ta paisa metetdaktsü.
Yaküm Kisama nung anogo 10 nü benjung amungdang nisung lakh 10 dak tema semdanga liasü aser iba nung Night Carnival aser Music Festival nung adenertembo züngsema mali. Taküma iba dang nungi talila arutsü imlar, ta Tourism Parliamentary Secretary-isa shisem.
Tourism Secretary, Angau I. Thou-i ashiba agi, Naga nunger sobaliba aser Hornbill festival ya linük indang benjung ka kümogo aser Naga nunger sobaliba akaba, tesem ka nung dang angutsü atema tourist tem atema sabang tajung ka lir.
Nagaland nung tensa kanga junga akümba ajanga taküm January nungi October tsüngda domestic tourists 43216 aser foreign tourists 1614 tashi semdangogo. Anungji, Naga nungertemi tensa merakdaktsüi terenlok aser tejakleni aotsü merangdi, ta laisa ayongzük.
Osangbener senden nung Music Task Force nung Project Director, Gugs Chishi-ia ashiba agi taküm International Hornbill Rock Contest nung kentener telok 20-i shilem agitsü aser parnok rongnung tangalen nungi telok 16 dena lir.
Hornbill Music Festival mezüngbuba anogoji Dimapur nung aliba DDSC stadium nung ayongzüka agitsü aser iba sentong nung Bollywood kentenertem – KK aser Kailash Kher nati shilem agitsü, ta Gugs Chishi-isa ashi.
Hornbill Festival nung Hortiscape, Mokokchung nung aser Kohima nungi Khezakeno, Phek tashi Motor Rally tem, Miss Nagaland, Kids Carnival, Naga Chef aser HIPFEST sentongtem ayongzüka agitsü. Taküm asoshi sentong talila ka bendenloka lir aser ibaji Department of Animal Husbandry & Veterinary Services ajanga Kisama nung Horse & Pony ride asütsü.