Ruskin Bond nem Lifetime Achievement Award agütsü

New Delhi November 26 (Agencies) : Tanü Honibarnü New Delhi nung Times Lit Fest sentong akadang ajaki jangja aliba kaket zülur Ruskin Bond nem literature tsütsü Lifetime Achievement Award agütsü.
Iba akhümket sempet nguli Bond-i kaket zülur Paro Anand den jembidang pai züluba kaket azünger lanurtem dang tzü mopung melenshiba atema jembisem.
“Tsüngremi yangluba kechisarena agi asenok dang imlibilem kanga sayur. Anungji ni iba melena meyiba agütsütsü kecha mali saka ajak agi temoatsütem tushia benjongtsü. Ni lipoküm mogin mesüra iba tsütsü inyaker nisung ka masü, ajisüaka ni item agi pelabaji kaket nung zülua lemsateptsü,” ta kaket zülusang, Ruskin-i khen bilemdanger ashi.
“Asen tanur aser semchirtem asoshi asenoki asen aliba lima kümzüka aser wazüka yutsütsü merangtsüla,” ta pai ashi.
Item o ya Bond-i India Habitat Centre, New Delhi nung sendena aliba kaketshitem aser nisung taintem dang ashiba lir.
“Ni tamajung ataloktsü amai bilemba nisung ka masü anungji ni asenok arishi küm 50 ang alitsü ta mashir. Ni tajung imlaba nisung ka lir anungji ni meimchirtem arishi küm 150 nung asütsü akok ta ashitsü,” ta lipoküm aser alima nung aliba kechisarena kanga meima kaket nung zülusang, Bond-i temulung shiranga ashi.
“Ni alimai asenok meimba indang züludang kaket tajungba züluteter. Meimchir aser shiruru tem dak ajemdaker ni otsü zülur. Kodang itemji mamshitsüsa kümdir ni ghost otsü zülur. Ajisüaka ajak nungji nature densema lir,” ta pai ashi.
Pei sasa pei den temba yimteter kaket aika azüngtsü merangtsüla, ta pai lanurtem ajungshi.
“Kaket azüngba agi ni tang tashi taküm lia arur. Kaket azüngba ajanga kü taküm tobur jungdaktsür,” ta paisa ashi.
Bond-i kaket azünger lanurtemi asüngdangba-a langzü aser pai iba mapang tang linük nung tanur tazüngertem jenjang aser pai mezüng angudang meimbatem dena lemsatep.