Sharif-i Pak mitkar lenisang atema Gen. Bajwa tenüng benok

Islamabad, November 26 (Agencies): Pakistan mitkar lenisang tasenba kümdaktsütsü atema Pakistan Ato Kilonser, Nawaz Sharif-i Lieutenant General Qamar Javed Bajwa tenüng tanü, Honibar nü benokogo.
Mitkar lenisang, General Raheel Sharif melenzüktsü atema Ato Kilonsersangi Islamist telungpur aser kiralongrartem makdoka, par Pakistan nung tensa tajungba kümdaktsüsang, Gen. Bajwa tenüng benoker lir.
Britain imli nungi küm 69 shi tejaklen nüchiso ngua, linük tasen tentetba Pakistan ajunga nung mitkar lenisangi tashi tulutiba abener.
General Sharif-i lenisütsü kümsük abensaba sülen mitkar lenisang mendenji tanü toktsütsü aser pa melenzüka, Gen. Bajwa-i alima ajunga nung mitkar züngsem timtiba alir tarensen nung 6 buba jenjang ngua aliba Pakistan mitkartem madak lenitsü temeten angutsü renema lir.