Nisung kari AAP MLA Alka Lamba yirutsüogo

New Delhi, August 09 (Agencies): Deobar anepdang Rajghat nung Chandi Chowk nungi Aam Aadmi Party (AAP) MLA Alka Lamba-i anir temesepba mozü anema sentong ka agiba mapang mejangjatetba nisung kari la yirutsüogo.
Mezüng osang ajanga ashiba agi, iba tatalokba sülen AAP lenirji arisanga RML hospital-i anir ao aser mapang tatsüka la zübo anepaluba sülen hospital toktsü.
Mejangjaba nisung kari la dak lung onloktsüba ajanga la tekolak nung zübo keta yiru.
Iba tatalokba aija AAP otongdar Ashutosh-i Lamba yirua anepaluba noksa kar internet nung inoktsüogo.
Paisa twitter ajanga, nisungbaji Vishwas Nagar BJP MLA Om Prakash Sharma’er dokan nung lia puogo, ta metetdaktsü.
“Alka yirutsüsangji nanglong dokan ka nung lia puogo, yangji alirtemi ashiba agi iba dokan kiburji Vishwas Nagar nungi BJP MLA Om Prakash Sharma lir. Iba ya (pa iba dokan nung alibaji) odang tia ajanga pa yangji ali asü mesüra sentong tamajung atongba’ar ibaji onoki bushisüngdangdaktsüner. Nisungba apuba jagi teperi masü,” ta AAP otongdar Ashutosh-isa shisem.
Ano külen AAP tongti lenir aser Delhi Chief Minister Arvind Kejriwal-i twitter ajanga Lamba nem tenüngsang agüja: “Na ajanga nüma tangteter, Alka,” ta lemsatep.
Iba dak sentakba nung Lamba-ia, police-i junga bushisüngdangtsü imlar, ta ashi.
Laisa, “temesepba mozü anema mozü lartem den onok o lemtep akaba mapang kü dak lung agi aon,” ta ashi.
“Nanglong dokan ka tema nung aliba takdang ka nung nisung ka blanket sü abener ni angu. Lokti pakshidaktsütsüji pa tebilemba liasü. Iba nung ya miim sentong tamajung ka lir, police-i junga bushisüngdangtsü, ta ni imlar,” ta laisa shisem.