J&K nung telungpur 2 kahset

Srinagar, August 09 (Agencies): Kashmir nung Line of Control (LoC) anasa Tangdhar sector nung yasüng nungi tenzüka aonung piyong kahtepdang telungpur ana aser army ka kahsetogo, iba den külemi nisung ana yiruogo.
“Kupwara district, Tangdhar sector nung telungpur anema operation aoba mapang sepai kati taküm tenla agütsüogo aser sepai ana yiruogo,” ta Srinagar nung army ketdangser kati ashi.
Iba rara nung asüsangji Bashir Ahmad lir. Honibar nü India tsütsülen LoC nung telungpur mezüng angusangji pa liasü. Telungpurtem jagi pa dak injang kahloktsü, aser pa yiruba zübo ajanga asü, ta ketdangserisa ashi.
Iba rara nungsa telungpur-a ana kahsetogo, ta TV osang ajanga ashi.
Police-i ashiba agi, Honibar nü Pakistan nungi telungpur 5-6 shi India tsütsülen LoC-i aittetba sülen army tem den kahtep.
Honibar nü Taya arem, Ragni Post anasa security sepai aser telungpurtem na tsüngda kahtep tenzük. Tang tesüsabuba osang aru tashi nunga parnok kahtepdar, ta ketsangserisa shisem.
Iba tesem jagi paramilitary commando tali yoksemogo, telungpur telok ka tang tashi arem nungji atsükoka lir, ta TV osang ajangasa ashi.