PM Modi-i Aug. 16-17 anogotem nung UAE semdangtsü

New Delhi/Dubai, August 09 (Agencies): Küm 30 dak tema India Ato kilonser kati UAE linük mesemdangi lir tang mezüng Narendra Modi-i August 16 nungi tenzüka anogo ananü UAE semdangtsü, iba mapang nung pai par linük lenirtem den shishilembaba aser security onüktem nung jembitsü aser yangji aliba India sensotem dena jembitsü, ta tanü osang ka ajanga metetdaktsü.
Official osang kar ajanga ashiba agi, Modi-i UAE anogo ananü semdangba mapang pai Abu Dhabi aser Dubai na semdangtsü, aser ibaji ajanga India aser Arab nunger linük UAE den rongsenkettsüng, sobaliba aser loktiliba nung tesentaktep tajungba küma yanglutsü imlar.
Tesüiba küm 34 tejaklen (1981) taoba mapang Ato kilonser asür, Indira Gandhi-i United Arab Emirates (UAE) semdanga liasü, aser iba sülenbo tang ang India Ato kilonser (Modi) kati iba linük semdanger asütsü.
Official data ajanga ashiba agi, India atema second largest export destination ji UAE lir aser 2013-14 küm US sen billion 30 jenjang shishilembaogo.
Ano yangji aliba India sensotemi Ato kilonser Modi agizüktsü atema Dubai Cricket Stadium Grounds nung terenemba tulu kadagi.
Indian Community Welfare Community (ICWC)-i sangdong ka ajanga, “Iba sentong takok angutsü asoshi organising committee ka tentetogo. Iba sentong nung adentsüpur sensotem atema anasatiba Metro Station, Dubai Mall aser Dubai Internet City nungi oli-oratsü atema transportation acha-ayangogo,” ta ashi.