Poland & Germany Tir nati NATO command center semdang

Warsaw, November 28 (Agencies): Poland aser Germany linük Tir anati North Atlantic Treaty Organization (NATO)’er anüdoklen tentetba command centre tanü, Hombar nü semdangogo.
Alima anüdoklen tsütsülen nungi arrürtemi lendong tsüdong bener arutsüba nungi kümzüka alitsü nükjidong nung NATO-i par tesepti-ji tajungba küma yanglushitsü tenzüka lir.
Poland Tir, Andrzej Duda aser Germany Tir, Joachim Gauck nati Poland kübok Szczecin nung tentetba NATO’er Multinational Corps Northeast tesepti nung tenzüker mitkar aser mitkar lenirtem tanü ajurutepa liasü.
United States (US) densema, NATO nung züngsemba linük 24 nungi mitkartem den NATO nung züngsema malir Finland aser Sweden linük na nungi mitkartemi NATO tesepti nung tenzükba osang bushiteta lir.
Russia linüki taoba mapang, 2014 küm Ukraine linük nungi Crimea Peninsula tashiyim agi agiba sülen par linüki par mitkar tashi amshia, kidangsüa alir NATO nung züngsemba linük nem Ukraine nem agütsüba ama timtem agütsütsü akok ta NATO-i tebilemtsü akatsü tenzüka lir.