Centre-i Delhi sorkar mapa meinyakdaktsüteter : AAP

New Delhi, November 29 (Agencies) : Delhi Chief Secretary K.K. Sharma tesem melenshitsüba ajanga linük yimtiba, Delhi nung Aam Aadmi Party (AAP) sorkar teinyaktsü tim mapatem meinyakteter, ta Mongulbarnü metetdaktsü.
Aam Aadmi Party nung lenir Ashutosh-i, Delhi nung AAP-i yimsü asütsü tenzükba sülen nungi centre-i Delhi sorkar kübok mapa kanga nendaka aser bendanga agüja inyakertem ajak aniener aser parnok melena mapa meinyakner anioka yutsür, ta ashi.
“Parnoki (Centre) Delhi nung shimteta aliba sorkar nem nüburtem atema mapa junga meinyaktettsüsa tensa bener arutsür, ajisüaka AAP item tetsükdaktsütem kokteta maneni mapa tajung inyaktsü,” ta Ashutosh-i ashi.
Osang ajanga ashiba agi, Delhi sorkar nung Chief Secretary tasenbaji IAS officer M.M. Kutty asütsü. Pa ya Chief M Minister Sheila Dikshit atema Principal Secretary inyaka aliba nisung ka lir.
Ashutosh-i ashiba agi, AAP sorkar dang Kutty yoktsü atema centre-i kecha meshishi.
“Shiba shimdir shimaka pai ozüng tuyuba ama nüburtem aser Constitution nem telangzüba agütsütettsüsa bendanga agüja inyaktsü imlar,” ta AAP lenir jagisa ashi.